Shillong, Risaw 24 : Ka Seng Samla Mawlai Phudmuri (SSMP) hynne ka sngi ka la pynkup burom ïa ki ar ngut ki samla kiba na shnong, ka samla Elsarica Umdor, ka thei ïalehkai badminton bad ïa u Bah Jeffrey Warlarpih, uba dei u coach jong ka jingïalehkai phutbol.
Ka Elsarica ka la shah pynkup burom halor ka jingïoh khur jong ka ïa ka jingjop ha kaba ka la wan ha ka kyrdan ba lai ha ka Under-19 jong ka jingïalehkai para marwei (Single) ha North East Zone Inter State Badminton Championship 2022 kaba la long ha Agartala Tripura.
Katba u bah Jeffrey u shah pynkup burom hadien ba ka Meghalaya Football Team ka ba la ïoh ïa ka kyrdan ba lai ha ka 4th edition jong ka National Khelo India Youth Games 2022 kaba la long ha Haryana.
Ka SSMP ka la pynkup burom ïa ki hynne ha ka sngi hadien ba ki la dep jied ïa u rangbah shnong bapura jong ka shnong Mawlai Phudmuri ba la pynlong ha madanheh stadium, Phudmuri.
Ha kajuh ka por ka SSMP ka ai ruh ka jingkitbok kitrwiang ïa kine ki 2 ngut ki samla ba kin nang kiew irat ha ka sap ka phong ka trei ka ktah ka pule ka puthi jong ki bad U Blei Un nang kyrkhu ïa ki ba kin dang shait nang khlaiñ.
Kumjuh ruh ka Seng ka ai ruh kane ka khubor sha baroh ki khynnah donsap ha kino kino ki liang jong ka jingïalehkai ba ka Seng Samla Mawlai Phudmuri kan ïai don ryngkat bad ki lada ki donkam kino kino ki jngkyrshan ba ka Seng ka lah bn leh na ka bynta ka jingkiew jong ki ha ki kam ïalehkai bad ka sap ka phong jong ki.
