Pynkup burom ka sorkar Jylla ïa ki nongïalehkai ba wanrah takma na Turkey, Thailand bad Vietnam

Shillong, Risaw 26 : Ka sorkar jylla ha ka sngi Balang ka la pynkup burom ïa ki nongïalehkai ba wanrah ïa ka nam bad burom da kaba khur takma na ki lympung ïalehkai na Turkey, Thailand bad Vietnam. Ka sorkar jylla ka la pynkup burom da ka song pisa kaba kot T. 12.50 Lak.
Ïa kane ka jingpynkup burom la pynlong hynne ka janmiet ha State Convention Centre, Shillong ha kaba u Conrad K Sangma Myntri Rangbah ka Jylla u la long kum u kongsan ha ka jingïadonlang u Bah Banteidor Lyngdoh Myntri ki kam ïalehkai kum u Symbud Kongsan.
La ïadonlang ruh Bah John F Kharshiing Working President ka Meghalaya State Olympic Association (MSOA), ki ophisar jong ka tnad sport, ki nongïalehkai bad kiwei kiwei.
Ki nongïalehkai kiba la shah pynkup burom hynne ka sngi, ki kynthup ïa ka Kong Margaret Pathaw kaba la khur takma Ksiar bad takma Rupa na ka lympung ïakhun kti World Arm Wrestling Cham-pionship kaba la long ha Turkey kaba la ïoh da ka song pisa ba 5 Lak tyngka, ka Kong Angel Mary Mylliem Umlong, Alexander Lyngdoh kiba khur takma rnong ki ïoh mar 1 lak tyngka, kiba dei ruh ki nongïalehkai Arm wrestling.
U Samla Donbor Rumnong uba jop takma rnong ha ka ‘Mr.Physique’ ha ka jingïalehkai WFF Proam Championship ha Vietnam u ïoh 1 lak tyngka bad u Raymon Nongkhlaw uba jop takma rupa ha ka Pro AM Universe Championship Bangkok, Thailand u ïoh 2 lak tyngka, kiba dei ki nongïalehkai pyni dohksah. Kiwei pat ki nongïalehkai ïakhun kti kibym shym la ïoh takma ki la shah pynkup burom lang da kaba sam ka song pisa ba mar 50 hajar tyngka.
U Myntri Rangbah haba ai jingkren u la pynpaw ka jingsngew-kmen ba ka jylla mynta ka la kiew shaphrang ha ki kam ïalehkai bad ai khublei ruh ïa kito ki nongïalehkai kiba la khur takma bad ai mynsiem ruh ïa kiwei ba kin dang trei shitom khnang ba ha kawei ka sngi kin sa poi sha ka thong.
U la ong ruh ba ka sorkar MDA ka buh ka thong ba hakhmat eh na bynta ban kyntiew ïa ki sap ïalehkai jong ki khun samla lyngba ki song jingïarap pisa khnang ba kin nang lah ban pyntbit shuh shuh ïalade bad kumjuh ruh ban pynbiang ki jaka ïalehkai.
U la ong ba ka jingpynkup burom song pisa ka long katkum ki kyrdan ïalehkai. U la bynrap ruh ba ha ki snem ba la leit ïa kiba khur takma ksiar ha ka National Games la ai 7 hajar tyngka hynrei naduh u snem 2019 ba la thaw ïa ka Youth Polisi la kyntiew ïa ka song pisa sha ka 2 Lak tyngka.
U Bah Banteidor Lyngdoh haba ai jingkren u la pynpaw ka jingai khublei ïa ki nongïalehkai kiba la rah ïa ka nam bad burom jong ka jylla bad ka ri India hi baroh kawei da kaba wanrah ki takma. U la ong ba ka jylla mynta ka la kiew stet ha ki jingïalehkai bad na ka liang ka tnad ïalehkai kan dang ïai bteng ban ai ka jingkyrshan ïa ki samla bad ki nongïalehkai kiba leit ban mihkhmat sha ki lympung ïalehkai bapher bapher.