Kano kano ka jinglong ka saiñhima sima kam ju neh ne sah hajuh hynrei ka kylla stet katkum ka jingïaid jong ki shalyntem ne ka jingtyllun jong ka por. Ha Meghalaya ruh, imat, nangne shakhmat, ka saiñhima sima kan sa kylla dur noh da kumwei pat. Lah ban ïohi ïa kane tang ha shwa ban poi u snem 2023, namar dei ha une u snem ba ka samoi jied syiem (MLA Election) kan sa long biang ha ka jylla Meghalaya ban jied thymmai ïa ki Nongmihkhmat paidbah ki ban mihkhmat na ki Constituency bapher bapher jong ka jylla Meghalaya.
Ki Seng Saiñpyrthei kiba kham kongsan ha Meghalaya kiba don MLA kumba long mynta ki long, ka NPP, ka UDP, ka HSPDP, ka PDF, ka KHNAM, ka NCP, ka Congress, ka BJP, nalor ki Independent. Kiba kham bun eh ki MLA ki long ka NPP, ka Congress, UDP, PDF bad HSPDP bad BJP nalor kiwei pat.
Hynrei, ka jingdon jong kine ki MLA ha kine ki party kin sa kylla rong noh hadien u snem 2023. Ka Congress kaba dei ka Party kaba khlaiñ eh bad heh paid naduh ki por ba mynshwa ha Meghalaya ka lah ban sa kylla noh hadien ba ka la troiñ noh na metbah Delhi. Ka NPP kaba khlaiñ kynsan ha u snem 2018 (na ka jingdon jong ki 2 ngut ki MLA ha u snem 2013 mynta ka kiew sha ka jingdon haduh 20 ngut ki MLA ha u snem 2018) ka lah ban kham hiar noh namar ka jinglong nongïalam jong ka ïa kane ka Sorkar Meghalaya Democratic Alliance (anti-incumbency) ba mynta.
Ka jingmih ne thaw Party thymmai ha rilum Garo ruh kan pynduh mynsiem ïa kane ka party. Ka UDP pat kum ka Party riewlum baheh tam ha Meghalaya kam da don thymmei eh sha rilum Garo. Ha rilum Khasi Jaiñtia te, ka jingïakhun ka bym lah batai satia. Ka BJP kan kham kiew ha ka kyrteng u Modi khamtam sha rilum Garo bad katto katne ki jaka ka Khasi Jaiñtia Hills.
Ka HSPDP kan ym kiew ne hiar eh, hynrei malu mala kin jop hi iwei ar kum ki riewshimet. Ka PDF kan hap trei tyngeh ban pynkhlaiñ bad seng nongrim bha ïalade lada ka kwah ban jop kham bun lym kumta ka lah ban nang hiar pynban na kaba la ïoh mynshwa.
Ka KHNAM bad ka NCP imat kine kin sa khylliap lama na ki dak ki shin kumba ka paw mynta namarba ka KHNAM bad ka NCP ka don mynta tang mar uwei u MLA. Ka lyer ka beh wur wur wer wer ba u MLA ba mynta ka KHNAM u Bah Adelbert Nongrum un leit pynïasoh noh ïalade sha ka Voice of the People Party.
Hynrei ka jingkylla kaba khraw eh ka saiñ hima sima kan long ka jingryngkang dieng kper ne phet seng kine ki Sitting MLA kiba mynta. Kin don kine ki MLA kiba mynta ki ban ryngkang ryngkoh noh sha kiwei kiwei ki Party kat kum ka jingkheiñ bad sngewbit jong ki (own political calculation). Don ki ban dang jop biang, don pat ki ban shah rem noh.
Ka jinglong kane ka pyrthei ba la shah ktah palat ha une u khñiang Corona ne Covid-19 kan pynkylla dur bak-ly-bak ïa ka jingmut jingpyrkhat (mind set) jong ki paidbah (Voters) bad kan ktah lang solonsar ïa ka pyrthei Politik ha Meghalaya ha ka MLA Election ka ban long ha u snem 2023.
Kaba kham ima eh ïa mynta ka dei ka jingpaw pyrthei jong ka Trinamool Congress. Kane ka seng saiñ pyrthei kaba don ïa ka Headquarter na Kolkata ka la sdang suhthied bha ha kane ka jylla Meghalaya na ka daw ka jingtrei borbah jong ka I-PAC. Ki briew kiba don hapoh ka I-PAC ki la rung lut sha ki kyndong kynshrot jong ka jylla Meghalaya ban twad jingmut na ki paidbah nongshong shnong ka jylla haduh katno ki angnud ïa ka jingkylla.
Hynrei, kaba kham sngew sammut ka long ba ka Trinamool Congress ka dei ka party kaba thymmai hynrei ki MLA pat ki dei kiba shu ryngkoh lut na ka Seng Congress dang shen tang na ka daw ba kim sngewtynnat ïa u Bah Vincent Pala kum u nongïalam. Kane ka long thik kumba theh ïa ka waiñ bathymmai ha ka lya snieh kaba rim.
