Pynkup burom ka Soil and Water Conservation ïa 21 ngut ki Field Assistant ba la pyndep ïaka jinghikai na CTI Byrnihat
Nongpoh, Ïaiong 04: Kumba 21 ngut ki Field Assistant bala dep ïaka jinghikai haka 49th Batch Field Assistant Training Course na Conservation of Training Institute Byrnihat mynta ka sngi kila shah pynkup burom haka prokram ba shongkun jong ka Passing out Ceremony bala pynlong da ka tnad Soil and Water Conservation jong ka sorkar Meghalaya bala pynlong ha auditorium ka CTI Byrnihat.
Ha katei ka jingïalang pynkup burom ïa kitei ki samla kiba la pyndep ïaka jinghikai la wan ruh ban shim bynta da u Marcuise N Marak Myntri ka tnad Soil and Water Conservation, kum u kongsan haka jingdonlang ka kong I Rynjah Director Soil and Water Conservation, M Ch Momin Additional Director, Bah OT Lyngwa Divisional Soil and Water Conservation Officer bad kiwei kiwei ki ophisar haka jingdonlang ki bahaiing ha sem jong kitei kiba la dep shah pyntbit na katei ka jaka ai jinghikai.
Napdeng kitei ki 21 ngut kiba la pyndep ïaka jinghikai bad jingshah pyntbit bala pynrung ha u snem 2022-23, 5 ngut ki dei ki kynthei bad 16 ngut ki dei ki shynrang ha kaba 12 ngut ki dei naka tnad Soil and Water Conservation, Assam, 2 ngut ki dei na Khasi Hills Autonomous District Council, Department of Forest, Shillong, 3 ngut ki dei na Jaintia Hills Autonomous District Council, Department of Forest, Jowai, 4 ngut ki dei na Soil and Water Conservation South Garo Hills Division, Baghmara.
Haba kren ha katei ka sngi kum u kongsan naka liang u Marcuise N Marak kum u myntri u la pynpaw ka jingsngewkmen kaba khraw bad ai ka jingïaroh ïa kitei ki 21 ngut ki samla kiba pyndep ïaka jinghikai pyntbit haki liang bapher bapher ha kaba ïadei bad ka jingpynneh pynsah ïaka mei mariang na katei ka jaka ai jinghikai kaba la paw haka jylla shuwa ba kin leit ban treikam sha ki tnad sorkar bapher bapher.
U la ong ruh ba kitei ki samla kiba la pyndep ïaki jinghikai ki long ruh kum ka bor bad ka jingkyrmen ïa ki tnad sorkar hadien ba kila pyndep hok ïaki jinghikai da kaba kyntu ruh ïaki ba kin pyndonkam hok ïaka jinghikai, ka jingstad ka jingtip bad ka buit kaba kila ioh naka bynta ka jingkiew shaphrang jong ki paidbah bad ka jylla haka liang ka jingpynneh pynsah ïaka mei mariang bad ki sawdong sawkun.
Ha katei ka sngi la sam ruh ïaki syrnod bad ki khusnam sha kitei ki samla kiba la wan shakhmat bad khur ïaki marks ba heh haka exam bad training, ka kam lehkai sports bad kiwei kiwei.