Khliehriat, iaiong 4 : Ka East Jaiñtia National Council hapoh ka jingïalam u President rangbah ka seng bah Sambormi Lyngdoh, hynnin ka sngi, ki la leit buh da ka dorkhas ha u Deputy Commissioner ka East Jaiñtia Hills District, u A. Baranwal (IAS), ha kaba ïadei bad ki post laitkam kiba pher ba pher hapoh ka District Selection Committee ha ka EJHD.
Haka jingthoh ka seng ka pynpaw ba ha kine ki por bala dep ki duna palat kiba ïoh rung ha ka DSC jong ka East Jaiñtia Hills District kiba dei ki nongshong shnong kane ka thain. Kumta ka seng ka pynpaw hakhmat u DC ba kat kum ka Reservation of Vacancies in services/posts under the state Government hapoh ka Office Memorandum No.PER.272/72/5.dated 18th Dec.1972, ha ka para 2.2 ka ïathuh shai ba ïaki post kiba dei ‘not transferable’ ki dei ban leit beit sha ki trai District (Local residents), kata haka jingjied ïa ki Candidate, la ïathuh shai ba ka jingjied ïa ki candidate kan long beit thik tang ïa ki trai District.
La ong ruh ba ha ka jingïakren bad u Deputy Commissioner na ka liang u President bah Sambormi Lymgdoh u la pynpaw ruh ba ka seng hi kaba shimkhia naka bynta ka bha ka miat khamtam na ka bynta ki samla wad kam, u la ban jur ba ïaki post hi ba hap hapoh ka DSC ka dei hok ban ïoh da ki trai District namar bun ki samla ka District mynta kidei kiba lah pyndep ïaki jingpule kiba lah biang eh bad ki DSC, bad kane kan sa ai mynsiem ruh ïa kito kiba dang pule.
Ka seng ka pynpaw ruh ba kam shym la pyrshah ne object ïa kiwei pat ki candidates kiba na ki wei ki thaiñ lada ym don candidate naka thaiñ, hynrei katba dang don ki candidate na ka thaiñ hi ka policy ka dei ban ïaid katkum ba la bthah da ka tnat ne Department jong ka Personnel & Administration Reform ba haba don ki candidate kiba lah biang(deserve) dei ban ai shwa na ka thaiñ hi.
Naka liang u DC ruh u la sngewïahap bha bad kane bad u la kular ruh ban ai ktien sha ki bor ba halor ban pyntreikam pura ïa kane ka jingdawa ka seng, na ka liang ka seng ruh kan sa nang ïai buddien ïa kane “Naka bynta ki nong shong shnong ka East Jaiñtia Hills District hi, khamtam kito ki samla wad kam ka seng ka ai mynsiem ba kim dei ban duh jingkyrmen bad ïa advertise ïa ki post khamtam ka DSC ba ki dei ban apply bad trei shitom ha ki jingpule, namar ka jingtrei minot hi ka wallam ïa ka jingjop ” pynkut u kyrwoh na u bah Sambormi Lyngdoh.
