Pynkup burom ka KSUS ïa ki samla pule da ka 4th U Woh Tep Kyndiat Memoral Acadamic Award 2023

Khliehriat, Risaw, 22: Ka Khasi Students Union Wapung Unit myn ha ka 21 tarik mynta u bnai risaw ka la ioh ban pynskhem ïa ki nongkitkam ba thymmai jong ka Unit kiba na ka bynta ka samoi treikam kaba naduh u snem 2023 haduh 2026.
Kumjuh ruh ha katei ka sngi ka seng ka la pynkup burom ruh ïa ki 39 ngut ki samla pule ka thaiñ kiba la pass bha shakhmat ha ki kyrdan pule bapher bapher ba kynthup ruh lai ngut ki samla kiba la ïoh ban mihkhmat na ka jylla sha ka National Football Tournament, la pynkup burom ïa ki da ka khusnam ba la tip kum ka 4th U Woh Tep Kyndait Memoral Acadamic Award 2023 bad u General Secretary jong ka KSU Seng Kmie, u bah Donald V Thabah u la wan ban long kum u kongsan ha katei ka sngi, ïa ka prokram la pynlong ha ïing Community Hall, Wapung Shnong.
Ha katei ka sngi u kongsan u la shim ïa ka bynta ba ha khmat eh ha kaba u la pyntian smai ïa ki nongkitkam ba thymmai jong ka KSU Wapung Unit ha ka jingdon ryngkat lang u Publicity Secretary KSU Seng Kmie, u bah Pynshai Rani kum u symbud kongsan.
U samla rangbah, Donald Thabah u la kyntu bad pynshlur ïa ki khynnah samla ba ki dei ban dang ïai bteng ïa ki jing pule jong ki bad ruh ban long kiba trei shitom ha ki jing pule la ka dei ha kano kano ka bynta ne ki jait jing pule ba ki pule bad u ai ruh ïa ka kti kamon, kti kadiang da kaba ong ba lada don ki samla kiba don kam jingïarap na ka liang ka seng ka kloi ban ïarap ïa ki bad ong ruh kum ka jingsneng jingkyntu ba ki khynnah samla kim dei ban ngop khamtam ha ki rynsan social media bad lada ki dei ban pyndonkam ïa ka ruh ki dei ban pyndonkam ban wad jingtip ym ban shu pynsyrwa kai ïa ka por.
Ki nongkitkam ba thymmai kiba la pynskhem ki kynthup u President, u samla rangbah Deiniwan Lyngdoh, Vice President, u bah Shibaitlang Rymbai, General Secretary, samla Hamewanpynhun Ryngkhlem, Assiatant General Secretary, u samla Janki Ryngkhlem, Finance Secretary, u samla Smatlang Siangshai, Environment Secretary, u samla rangbah Hamieh Dkhar, Organising Secretary, u samla rangbah Nicholas Rymbai, Assiatant Organising Secretary, u samla Jomi Kyndait, Education Secretary, u samla Lucky Rymbai, Assiatant Education Secretary, u samla Samla Phulmi Dkhar, Sport Secretary, u samla Senmon Siangshai, Publicity Secretary, samla Victoria Phawa bad kiwei kiwei.
Ha katei ka sngi la ïa don ryngkat lang ruh ki nongialam ka KSU East Jaiñtia Hills District Unit ba kynthup, u President, u samla rangbah Streamly S Suchen, u Asst Finance Secretary, Cherity Suja, Finance Secretary, Shaniahskhem, u Principal jong ka K.B Memorial Secondary School Wapung, u bah Heipor Uni Bang bad ka Head Mistress jong Wapung Shnong Seiñ Raij L.P&U P School.
U MDC ba rim jong ka thaiñ, uba dei ruh uwei na ki nong ai buit ai bor jong ka Seiñ Raij Tuber, u bah Helping Phawa, uba la ïa don lang ha katei ka sngi, u la pynsngew ïa ka khana lyngkot shaphang u khlawai ka ri uba na ri lum Jaiñtia, u Woh Tep Kyndait.
Ha katei ka prokram sam khusnam, la ïa don ryngkat ruh ki longkmie, longkpa na ka thaiñ, ki nongkitkam shnong jong ka Wapung Shnong bad kiwei kiwei ki riew rangbah, ïa ka prokram la pyniaid da u Asst General Secretary KSU EJHDU, u samla Pynshaikupar Dkhar.