Kynmaw burom ka tnad Pulit ka West Khasi Hills ïa ki Pulit kiba la khlad ha ka jingïakhun bad ki riewkieng atiar
Nongstoiñ, Risaw, 22: Ka tnad pulit jong ka West Khasi Hills District ha ka 21 tarik ka sngi saitjaiñ ka la rakhe ïa ka kum ka martyr’s day, lane ka sngi kymnaw burom ïa ki pulit kiba la khlad noh ha ka jingïaleh bad ki kynhun kieng atiar ha kylleng ki jaka.
La pynlong ïa ka jingkynmaw burom kaba kyrpang ïa katei ka sngi, da kaba pynlong ïa ka jingïalang ba lyngkot ha phylla jong ka ophis u Superintendent of Police ha Nongstoiñ, ha kaba baroh ki ophisar pulit jong ka District ki la ïadon ryngkat. Kiwei pat ki long ki khynnah skul jong ka KJP Synod Sepngi Secondary bad na ka Rev JJM Nicholsrot Secondary school.
Ha katei ka sngi ha shuwa ban pynlong ïa ka salute, la pdiang burom ïa u bah Garod LSN Dykes Deputy Commissioner ka West Khasi Hills u ba la wan ban ïashimbynta lang ha katei ka jingrakhe ïa katei ka sngi. La pynsngew ruh ïa ki kyrteng jong ki pulit na ki jylla bapher bapher kiba la khlad ha ka jingïaleh bad ki riew kieng atiar da u bah Bikram Marak Superintendent of Police West Khasi Hills bad kum ba long ka rukom jong ka tnad pulit, la pynlong ïa ka jingsiat suloi lai sien lai wat sha suiñ.
Ha katei ka sngi la donlang ruh kiba haïing hasem jong ki ar ngut ki pulit jong ka West Khasi Hills DEF, kata u (L) bah Betly Ryntathiang Inspector u ba la khlad ha ka 27 tarik Jylliew 2003 ha ka jingïasiat bad ki kynhun kieng atiar ka ANVC bad NSCN ha ki thaiñ Borsora khappud bad ka Bangladesh bad u (L) Rel Deo Sangma constable West KHasi Hills DEF, u ba la khlad noh ha ka jingïasiat bad ki riew kieng atiar jong ka kynhun LAEF ha ka 7 tarik Nohprah 2008 ha Dymmut kaba hap ha Shallang Police Station.
Kum ka dak jong ka jingkynmaw burom ïa kitei ki pulit kiba la aiti ïa la ka jingim na ka bynta ban shakri ïa ki paitbah ka jylla, la pynlong ruh ïa ka jingbuh syntiew da kiba haïing hasem jong kitei ki pulit kiba la khlad noh.
La pynbud ruh ïa ka jingbuh syntiew da ki ophisar pulit ka district naduh u Superintendent of Police, Commandant ka 4th MLP Bn, Deputy Commissioner, Additional SP, Circle Inspector IBI, SDPO, bad ki Officer Incharge jong ka Nongstoiñ Police Station bad ki khynnah skul.