Nongpoh, Risaw 31 : Ban ai mynsiem bad ban pynshlur ïa ki samla pule ka shnong Umsawnongkharai ba kin dang kiew shaphrang ha ka jingpule puthi, ka KSU, Umsaw-nongkharai Unit ha ka sngi Saitjaiñ ka la pynkup burom kyrpang ïa ki samla ba pas bha ha ka SSLC bad HSSLC na ka Shnong Umsawnongkharai
Ïa kane ka khusnam ba ka KSU, Umsaw-nongkharai Unit ka la sam sha ki samla pule la ai kyrteng kum ka ‘Academic Excellence Award 2022’ bad kum ka seng ka la shim ruh ïa kane ka sienjam ka long ban ai mynsiem bad ban pynshlur ïa ki samla pule jong katei ka shnong ha ka pule ka puthi.
Ka KSU, Umsaw-nongkharai Unit ka la lah ruh ban sam ïa katei ka khusnam haduh 16 ngut ki samla pule na katei ka shnong kiba la pyndep ïa ka examination SSLC bad HSSLC jong u snem 2022.
La sakhi lang ruh ha kane ka sngi da ka jingdon lang u samla Shiningstar Kharbihkhiew, uba dei u Assistant Education Secretary KSU, Seng Kmie kum u kongsan bad ryngkat ka jingdon lang ka Kong Veronica Santi Warjri Headmistress ka St. John Secondary School Jyntru kum ka symbut kongsan bad kyntup ruh u samla Vincent Makri, Finance Secretary ka KSU NKHD, u President ka KSU Umsawnongkharai Unit, u Ssamla John Lyngdoh bad kynthup kiwei kiwei ki nongïalam ka seng bad ki samla pule.
Nalor ka jingsam khusnam sha kitei ki samla, u Samla Shining Kharbihkhiew u la ai jingkren ruh ha kane ka sngi ban ai mynsiem ïa kitei ki khun samla kiba la pyndep ïa kitei ki kyrdan jingpule bad kum u nongïalam seng u la kyntu ruh ïa ki ba ki dei ban trei shitom ha ka jingim, namar dei tang ka jingtrei shitom kaba lah ban pynlong briew ïa ki hadien habud bad ruh ba kin ioh kheit ïa u soh bathiang ha ka jingim kaba long ka lawei ba phyrnai ha ka jingim jongki.
