Khliehriat naiwieng 12: Ka Bataw Youth Welfare Spoet Club East Jaiñtia Hills District, myn ha ka sngi ka la pynlong ïa ka jingialang ba kyrpang ha East Side Inn Hotel, East Jaiñtia Hills District, ha kane ka jingialang la pynkup burom ïa u rang ialehkai football ba paw, uba ialehkai na kawei ka club kaba na Mumbai (Mumbai City FC) , u samla Halen Nongtdu.
U samla Halen Nongtdu, u dei u samla uba na ka shnong Byndihati, East Jaiñtia Hills District, uba la bat ïa ka kyrdan kum u Youth Ambasador ba nyngkong ha u snem 2021, uba mih khmat na ka ri India bad mynta u dei uwei na ki rang ialehkai football uba ïalehkai na ka Hero Indian Super League (ISL), Ka Club Mumbai City-FC, myn ha ka sngi saitjaiñ ka Bataw Youth Welfare Sport Club ka la pynkup burom ïa une u samla da ki khor ki khriam, ki jaiñ tlem, ki jaiñ ryndia.
Haba kren ha ka jingïalang u rangbah shnong Bataw, u bah Skhem Sumer, u President jong ka Bataw Youth Welfare SC, u bah Martin Lyngdoh bad u Secretary jong ka Club, u bah Almight Biam, ki la ai ka jingkhublei kitbok kitrwiang ïa u samla Halen Nongtdu ba un nang lah ban iaid shaphrang ha ka kam ialehkai Football bad ki pynpaw ruh ka jingsngew kmen ba une u samla u la wanrah ïa ka nam ka burom ïa ka district bad ïa ka jylla hi baroh kawei, ha kajuh ka por u waheh shnong u ai khublei ruh ïa u bah Streamly Suchen, u bah Shaniahskhem Dkhar bad kiwei kiwei kiba ju iarap lem ïa ka Sport Club ha kiba bun ki liang.
U bah Shaniahskhem Dkhar, u ong ba kum ki khun samla jong ka East Jaiñtia Hills ki dap da ka jingsngew kmen bad sngew sarong ba u samla Halen Nongtdu u la rah ïa ka nam ka burom jong ka district hi baroh kawei, u la ai ki kyntien kyrkhu kyrdoh ba un ioh ka met ba koit ba khiah bad ai mynsiem ba un nang iaid shuh shuh sha khmat.
Na ka liang u samla Halen Nongtdu u la ai mynsiem ïa kiwei kiwei ki para samla bad ong ruh ba ka sport kam kut tang hangne, mynta lei ba lah don ka madan Artificial Turf ha Deiñchynrum ki samla kim dei ban duh jingkyrmen hynrei ban trei shitom ban poi sha ka thong “Don bun ruh ki lympung ialehkai, ym dei tang ha ka football hynrei ha kiwei kiwei ki jait sport ruh” u la bynrap.
Utei u khlur ïalehkai, u la ai ka jingkhublei ïa kiba ha iing ha sem , ïa ki paralok baroh kiba ju ai mynsiem bad kyrshan lem ïa u man ka por bad u la pynpaw ruh ba u la lah ban poi shaduh kane ka kyrdan ka dei ruh lyngba ka jingtrei shitom jong u, u kyntu ïa kiwei ruh ki para samla ba kin long kiba trei shitom ban kynjoh sha ka thong.
Kiwei ruh kiba ai jingkren ki kynthup u bah Streamly Suchen bad kiwei kiwei, ïa ka jingialang la pyniaid da u bah Ampli Rupsi uba dei u Secretary shnong Bataw.
Ha kane ka prokram u samla Halen Nongtdu u la pyllait ïa ki jersy football kiba dei ki jersy jong ka Bataw Youth Welfare Sport Club bad kitbok kitrwiang ruh ïa ka BYWSC ba kan nang kiew shaphrang.
