Pynkulmar shnong ki khubor lamler ha social media, wat kyrkieh thep khlem pyntikna shwa: CM

Shillong, Risaw 16 : U Myntri Rangbah ka Jylla Conrad K Sangma u la khyrwit tyngeh ïa ki briew kiba stet palat ban pyllait ha ki rynsan social media ne ha ki youtube ïa ki jingjia kiba ïadei bad ki kam thombor ïa ki longkmie kumjuh ïa ki khunlung khynnah khlem da pyntikna shwa la kitei ki khubor ki dei neem kiba shisha.
Kane ka jingmaham jong u Myntri Rangbah ka dei hadien ka jingïalang bad ki nongïalam shnong, ki nongïalam niam, ki nongtrei mon sngewbha, ki ophisar bad ki heh pulit ban ïatai kumno ban ïakhun bad tehlakam ïa ki kam thombor bad ki kam bymman kaba ktah ïa ki longkmie bad kumjuh ïa ki khunlung khynnah.
“Nga kwah ban kyrpad ïa ki paidbah baroh namar mynta namar ka jingdon ka social media ka jingphriang ki khubor thok bad ki khubor lamler ki jur bha. Kine ki jait khubor ki phriang stet nalor ba ki dei ki khubor ki bym pat tikna,” ong u Myntri Rangbah ka jylla Conrad K Sangma.
U Myntri Rangbah u ong ruh ba dei na kine ki jait khubor ki paidbah ruh ki kloi bha ban khihwin bad ka pynlong ïa ki nongshong shnong ban ïa mih paidbah bad kynnoh kynthoh ïano ïano tang na kaei kaba ki ïohi ha ki whatsapp lane ha ki youtube video.
“Kiba kum kine ki jingjia ki wallam ïa ki jingjia kiba pynkhihwin kiba lah wat ban ktah bad pynthut ïa ka shong suk shongsain ruh. Kumta kam long kaba dei ban shu ngeit pdiang kat ïa kaei kaba mih ha ki youtube videos ne ki khubor kiba poi ha ki whatsapp. Dei ruh ban husiar na kum kine ki khubor bad dei ruh ban da pyntikna bha shwa ban ngeit ïa kum kita ki khubor,” kyntu biang u Myntri Rangbah ïa ki nongshong shnong ka jylla.
Shuh shuh u ong ruh ba lada don kum kine ki khubor kan bha shwa ban pyntikna na ki nongïalam shnong bad pyntip sha ki pulit khnang ban ïoh leh ïa kaba donkam.
U Myntri Rangbah u la maham tyngeh ïa kito kiba ju mlien ban pyllait khubor pathar tang ban khring bun ki nongpeit ba ki dei ban pyrkhat arsien namar kane ka jingleh jongki ka lah ban ktah pat ïa ka shongsuk shongsain.
“Ka long kaba donkam ïa baroh ban long kiba peitngor bad shim ïa ka jingkitkhlieh shwa ban pyllait ïa ki khubor namar ïoh kaei kaba ki buh ha ki social media ka lah ban poi haduh u pud jong ka jingkulmar,” u la ong.