Pynksan ka tnad election ïa ka rai ka MTS ai jingbit ïa ki Dorbar shnong ban pynlong ïa ka Common Platform

0

Shillong, K’ Lyngkot 31: Ka tnat District Council Affairs ha ka sngi Thohdieng ka la ong ba ki dorbar shnong kiba la dep shim ka rai ban pynlong tang ïa ka common platform na ka bynta ki jingïalang paidbah jong ki seng saiñ pyrthei bad kumjuh ruh na ka bynta ki kyrtong shimet la ai jingbit ki lah ban leh ïa kata.
Kane ka long kum ka jingbteng kaba ïadei bad ka hukum kaba la pynmih ha ka sngi Palei.
“Kum ban bteng bad ka hukum ba la pynmih da kane ka ophis ha ka 30 tarik mynta u bnai, 2025, kane ka tnat ka la bthah ïa baroh ki deputy commissioner ba kin kyrpad ïa ki rangbah shnong ne ki dorbar shnong ban shah pynlong ïa ki jingïalang paidbah jong baroh ki seng saiñ pyrthei ba kynthup lang ïa ki kyrtong shimet na ka bynta ban pynlong ïa ka elekshon kaba laitluid bad kaba khuid ha une u snem 2025. Ha kajuh ka por la pynshai shuh shuh ba kito ki rangbah shnong ne ki dorbar shnong kiba la shim ka rai ban shah pynlong tang ïa ka common platform na ka bynta ki jingïalang paidbah jong ki seng saiñ pyrthei bad na ka bynta ki kyrtong shimet la ai jingbit ba ki lah ban leh ïa kata,” ong deputy secretary ka DCA M Shira Kshir ha ka shithi ba la pynmih ha ka sngi Thohdieng.
Ïa kane ka shithi la phah sha baroh ki District Election Officer (DEOs) bad Returning Officer (ROs) ka East Khasi Hills, West Khasi Hills, South West Khasi Hills, Eastern West Khasi Hills, Ri Bhoi, East Jaiñtia Hills bad West Jaiñtia Hills bad Sub-Divisional Officer (SDOs) jong ka Amlarem, Pynursla, Patharkhmah, Mawshynrut bad Ranikor ban leh ïa kaba donkam.

Leave A Reply

Your email address will not be published.