Naba kwah ïa ka Article 371, dei ban kyntait ïa ka VPP, kyntu ka Congress ïa ki paidbah

Ïalam bakla ka kyrtong MDC VPP na Mylliem

0

Shillong, K’lyngkot 31: Ka seng Congress ha ka sngi Thohdieng ka la kyntu ïa ki paidbah ka Ri-lum Khasi-Jaiñtia ba kin kyntait ïa ka Voice of the People Party (VPP) namar ka rai ba kwah ban wanrah ïa ka Article 371 hapoh ka Jylla Meghalaya lada ka shah jied ban wan ha ka bor.
Ha kaba ïadei bad kane haba ïakren bad ki lad pathai khubor u MLA ka Congress na Mylliem u Bah Ronnie V Lyngdoh ula ong, “Phi la ïohi ïa ka jingkren jong ka VPP ba lada ki wan ha ka bor, kin sa dawa ban pyntreikam ïa ka Article 371. Ngam lah ban sngewthuh shuh namar ban dawa Article 371 ka long thik kum uto u briew, uba ong nga kwah ïa ka Ïing hynrei ynda ula ïoh, u thang noh pat ïa ka. Kumta, nga kyntu ïa ki paidbah ka Ri-lum Khasi-Jaiñtia ba kim dei ban shah ïalam bakla bad ban ym kyrshan satia ïa kum kine ki party”.
U MLA ka Mylliem ula ong ba dei ka Congress party kaba la ai ïa ka Sixth Schedule ïa ka Jylla Meghalaya. “Haduh mynta, ka khyndew ka shyiap, ka riti ka dustur bad ka khaiï ka pateng ki dei kiba la ïada namar ka jingïohi jngai jong ki nongïalam ka Congress lyngba ka Sixth Schedule”.
U Bah Lyngdoh ula ong ruh ba lada ka Article 371 ka kham khlaiñ bor ban ïa ka Sixth Schedule, balei pat ba ka Ladakh ka dawa ban pyntreikam ïa ka Sixth Schedule hapoh ka jaka jong ki. “Kane ka dei namar ka jingshisha hi ka long ba ka Article 371 kan ym ïada ïa ka khaiï ka pateng jong ki paid riewlum. Kumta, ka Sixth Schedule ka kham khlaiñ bor haba phai sha ka jingïada ïa ki riewlum trai muluk, ka khaïi ka pateng, ka khyndew bad kiwei kiwei,” ong u Bah Lyngdoh da kaba kyntu ïa ki paidbah ba kin kyrshan tylli ïa ka Congress khnang ban nang pynkhlaiñ shuh shuh ïa ka Sixth Schedule ka Riti Synshar jong ka Ri India.
Haba kylli, u nongïalam ka Congress ula ther tyngeh ruh ïa ka VPP namar ka jingshim kylliang ïa ki buit ka BJP ban shim kabu ïa ka jingngeit niam jong ki paidbah. “Kaei ka jingïapher hapdeng ka BJP bad ka VPP?. Baroh ar ki shim kabu ïa ka jingsngew niam jong ki paidbah. Lada ngi kynnoh ïa ka BJP ka shim kabu ïa ka jingsngew niam, ka VPP ruh ka dei ïa kaba hap kynnoh ba ka leh lang kumjuh,” bynrap u Bah Lyngdoh.
“Ngi lah beit ban kam ba ngi ieid jaitbynriew hynrei ki kam jong ngi kim dei ban kren da kumwei. Mynta phi kwah ban pynduh noh ïa ka Sixth Schedule. Lada wan ka Article 371, ki Dorbar Shnong kin sa duh noh. Kumno phi kam ba phi ieid jaitbynriew. Ha kine ki 73 snem ba la leit, ka Sixth Schedule ka la ai jingïada ïa ngi kumta balei ba ngin pynduh noh ïa ka,” buh jingkylli u nongïalam ka Congress.
U Bah Ronnie ula leit ban synran ïa ki kyrtong ka party kiba leit thep kyrteng hynne ka sngi ban ïakhun ïa ka elekshon MDC ba kynthup ïa u Bah Banphiralang Basaïawmoit na Mylliem bad u Bah Manuel Badwar na Laitumkhrah-Malki.
Halor kane u Bah Banphira ula pynpaw ïa ka jingsngewskhem ba ka party kan jop ïa ka elekshon KHADC bad ong, “Ngi la trei shitom ban jop ïa ka elekshon bad ngi sngewskhem khlem ka jingartatien ba ngin jop.”
Ha kawei pat ka liang u nongïalam ka Congress bad MLA ka Mylliem Bah Ronnie V Lyngdoh ha ka sngi Thohdieng, ula kynnoh ba ka kyrtong MDC ka Voice of the People Party (VPP) na Mylliem ka kong Aibandaplin Lyngdoh Nonglait, ka la ïalam bakla ïa ki paidbah da kaba kam ba ka pule Theology haba ka pass tang ka klas XII ha ka affidavit.
“Ngi la pule bniah ïa ka affidavit bad ngi shem ba ka kong Aibandaplin Lyngdoh Nonglait ka la ïalam bakla ïa ki paidbah da kaba kam ba ka pule Theology hynrei ha ka affidavit ka la pynpaw ba ka dang pyndep tang ïa ka klas XII,” ong u Bah Ronnie haba ïakren bad ki lad pathai khubor.
“Kane ka pyni ïa u pud ba haduh katno ka lah ban shim kabu ïa ka jingsngew jong u paidbah. Ka affidavit ba ka la ai haba ka ïakhun ïa ka elekshon MLA 2023 ka pyni ba ka dei tang kaba pass klas XII. Ym shym la pynpaw ba ka pule ïa ka Theology. Lada ka lah ban thok ïa u paidbah ha shuwa ban jop ïa ka elekshon, ngam tip shuh katno kan leh hadien ba ka jop,” kynthoh u MLA.
U Bah Ronnie u dei uwei na ki MDC ba mynta uba la rai ban ym ïakhun shuh ïa ka elekshon sha ka Ïingdorbar ka KHADC ne ka elekshon MDC.

Leave A Reply

Your email address will not be published.