Pynkhuid shnong ka HITO Marshyllong-Nongbah ha ka jingrakhe dap shi snem

Mawkyrwat, K’lyngkot, 17: Kum shibynta ka jingrakhe ïa ka jingdap shi snem, ki nongkitkam bad ki dkhot jong ka Hynñiewtrep Integrated Territorial Organisation (HITO) Marshyllong-Nongbah Unit, ki la pynlong da ka jingpynkhuid shnong hapoh jong ka shnong Marshyllong bad ha Nongbah-Marshyllong, South West Khasi Hills District.
Ha kane ka jingrakhe, ki nongkitkam ryngkat ki dkhot ki la buh ruh ïa ki 14 tylli ki tin theh ñiut ha manla ki lad kata ha shnong Nongbah – Marshyllong-Nongbah bad kumjuh ha Shnong Marshyllong.
Ïa kane ka prokram la lamkhmat da u President u Bah F. Wanniang bad ym tang kata la pynlong ruh da ka jingïalang ba lyngkot ha kaba ki nongkren ki long u Bah F. Wanniang, u Bah P. Kharjahrin uba dei u Sports Secretary jong ka unit.
Ka seng ka la khot sngewbha ruh ïa u General Secretary jong ka HITO South West Khasi Hills District u Bah H. Marshall Ramsiej uba la ai ruh katto kattne ka jingkren kyrkhu kyrdoh ïa ka seng.