Nongstoiñ, Nailar 20: Watla ka election ban jied ïa ki nongmihkhmat sha ka Ïing dorbar jong ka Khasi Hills Autonomous District Council ka dang kham shim por, hynrei u bah B Iskarland Nongsiej u samla rangbah u ba long ruh u nonghikai skul ha ka shnong Mawdet Rambrai, u la sdang mynta ban pynkhreh ba un ïakhun ïa ka election MDC kum u kyrtong shimet na katei na ka Rambrai Jyrngam Constituency.
Ka jingpynkhreh ka jong u ka la sdang naduh ki bnai ba la dep bad ha ka sngi saitjaiñ u bah Nongsiej u la lum ïa ki nongkitkam bad ki dkhot jong ka Independent Group ha rambrai, ha kaba ki nongkitkam bad ki nongïalam na kylleng ki jaka ki la wan poi. Ha katei ka sngi la pynlong ïa ka jingïalang ha ïing dorbar jong ka shnong Rambrai, ha kaba la pynïaid da u bah Bullman Marbañiang sordar jong ka shnong Rngi Lower Ïew Rambrai.
Ha katei ka jingïalang la ïadonlang ruh da u bah R.G.Momin MLA shimet jong ka Rambrai Jyrngam u ba don mynta ha ka sorkar MDA II, kiwei pat ki nongïalam jong ka Independent Group kiba la mih madan ban ïaleh election ha ki snem ba mynshuwa, kum u bah Chenang Marak na Rangsahpara, bah Alfred Kharbani na nong Umkap, u bah Lurshai Kharbani Dkhot ka District Selection Committee jong ka West Khasi Hills bad kiwei kiwei.
Ha katei ka jingïalang la ïoh ïa ka jingkren lyngkot na u bah Alfred Kharbani, u bah Lurshai Kharbani bad na u bah R.G.Momin MLA ka thaiñ. U bah Momin haba ïakren bad ki lad pathaikhubor hadien ba la wai ka jingïalang, u la ong ba hadien ba u ban B.I.Nongsiej u la pyntip ba un lum ïa ka jingïalang ha katei ka sngi, u la pyllait por bad u la don ruh ka jingthmu ba un wan ban ïakynduh ïa ki paitbah, namar naduh ba u la jop kum u MLA um shym pat la ïoh lad ban wan ïakynduh ïa ki paitbah ha Rambrai.
Haba kylli pat ba u la pynthikna ne em ba u bah B.I Nongsiej, un ïakhun kum u kyrtong shimet na ka Independent Group ha ka election MDC ha u snem ban wan, u la ong ba haduh mynta ym pat don kiwei pat kiba wan ban ïakynduh ïa u ban pan kyrpad ba un kyrshan lem ha ka MDC, hynrei dei tang u bah Nogsiej marwei uba la kyrpad ïa u ba un ïarap lem ha ka MDC Election.
Haba kylli pat ba naduh ba ki paitbah ki la pynjop ïa u kum u kyrtong shimet ban long nongmihkhmat, hato ki don ne em ki seng saiñ pyrthei kiba wan khroh ba un rung noh sha ki party, u la ong ba ki don bun ki party kiba la wan khroh ïa u hynrei um sngew donkam eh, namar ba mynta u don lang ha ka sorkar. U la ong ba u bah B.I.Nongsiej u dei u nongkyrshan ba radbah jong u ha ka election ba la dep.
Haba kylli pat ba kum u nongmihkhmat un ïaineh beit kum u kyrtong shimet ne u don jiigmut ban rung ha kano kano ka seng saiñ pyrthei, u bah Momin u la ong ba ïa mynta ka por ka dang kloi than ban ong ïa kata, hynrei u dang pyrkhat bad mutdur da kano ka sienjam un shim.
Na ka la liang u bah B.I Nongsiej pat haba haba ïakren hadien ba la wai ka jingïalang, u la ong ba ka jingpynkhreh jong u ban ïakhun ha ka Election MDC kam dei da ka mon jong u shimet, hynrei ka dei ka jingkwah jong ki paitbah ka constituency.
Haba kylli pat la u don ne em ka jingkyrmen ba u MLA un ai ka jingkyrshan ba pura lada un ïakhun kum u MDC na ka Independent group, u bah Nongsiej u la ong ba u MLA u bah R.G.Momin u la dep pynthikna ha u, ba un ïarap bad kyrshan pura ïa u, namar ha kane ka election MLA ba la dep dei tang ma u ba la ai ka jingkyrshan ba radbah ban pynjop ïa u bah Momin. U don ka jingkyrmen kaba skhem ba lada u MLA un ai ka jingkyrshan ba pura um don jingartatien ei ei ba un jop.
