Shillong, Nohprah 15 : Ka sorkar pdeng ka la pynkhreh mynta ban ithuh bad pynbna noh ïa ka North Eastern Indira Gandhi Regional Institute of Health and Medical Sciences (NEIGRIHMS) kum ka Institute of National Importance (INI).
Ïa kane la pyntip da u Myntri ka tnad ka Koit ka Khiah ka sorkar pdeng, u Dr. Mansukh Mandaviya ha ka shithi sha u Myntri ka tnad AH & Veterinary ka sorkar jylla, Bah AL Hek.
Haba kren bad ki lad pathai khubor, u Bah Hek u la ïathuh ba ha ka 18tarik Risaw u la thoh sha u Myntri ka sorkar pdeng ban kyntiew kyrdan noh ïa ka NEIGRIHMS sha ka kyrdan kum ka AIIMS (All India Institute of Medical Sciences).
U Bah Hek u la ong ruh ba u Myntri dang hynin ka sngi u la jubab ïa ka shithi jong u kaba ong ba haduh mynta kam pat don kano kano ka jingpyrkhat ne ka jingtyrwa ban kyntiew kyrdan noh ïa ka NEIGRIHMS Shillong kum ka AIIMS hynrei la don pat ka jingpyrkhat ba lah ban pynbna ïa ka kum ka INI (Institute of National Importance).
Halor ka jingkylli u Bah Hek uba dei ruh u Myntri barim ka tnad ka Koit ka Khiah ka jylla u la ong, “Ka kyrdan INI kam da ïapher than eh na ka kyrdan kum ka AIIMS namar kin sa ïoh kham bun ki jingmyntoi na ka bynta ka jaka sumar bad ruh an bynta ki nongtrei kynthup ïa ki doktor bad ki specialist.”
U ong ruh ba kane kan ïarap ïa ka NEIGRIHMS ban pynneh ïa ki doktor ha katei ka jaka sumar.
Katkum ka jingong jong u, ka jingeh ba ka NEIGRIHMS ka kynduh ka long ba kam lah satia ban pynneh ïa ki doktor namar ki dang duna ki jingmyntoi kiba katei ka jaka sumar ka ai sha ki doktor. U la ïathuh ruh ba ka NEIGRIHMS ka la kyrpad ban pynïoh jaka ha New Shillong Township ha ka dor kaba biang na ka bynta ban pynbeit ïa kane ka jingeh khnang ban lah ban pynkohnguh ïa ki doktor ba kin sah ha kane ka jylla.
U ong ruh ba ïa kane ka sorkar jylla ka hap ban bishar bniah kumba ka leh bad ai jaka ïa ki ophisar IAS ha NST.
