Mih ki paidbah ha ka por ba jurip ka Myntri ïa ka Umthlong PHC, ha u Nohprah kular pyndep noh

Shillong, Nohprah 14 : Da ki spah ngut ki paidbah nongshong shnong ba don sawdong bad ka Mylliem Umthlong, Maweitnai ki la ïa mih ha step sngi Palei ban synran lang ïa ka Myntri ka Koit ka Khiah Kong Ampareen Lyngdoh bad ïa u MLA barim ka Mylliem Bah Hamlet Dohling ha ka jingleit jurip ïa ka PHC Umthlong kaba dang pyntrei mynta.
Kane ka jingmih ki paidbah ka long ban pynpaw ïa ka jingsngewnguh ïa ka sorkar kaba la sngap ïa ka jingkyrpad jong ki kaba ki pynsngew lyngba u Bah Hamlet Dohling ha ka por ba dang long kum u MLA ban kyntiew kyrdan noh ïa ka Umthlong Sub Centre sha ka PHC.
Lah ban kdew ruh hangne ki shnong kiba don ha katei ka thaiñ ki hap ban leit shaduh Pomlum PHC lane shaduh Shillong ban phah sumar lada jïa ba na ka Sub Centre ym lah shuh ban sumar kumta ka ktah ym tang ïa ka bai kali hynrei ïa ka jinglut jingsep.
Na ka liang ka Myntri haba kren hadien ba la dep jurip ka la ïathuh ba ki paibah kin ym khuslai shuh namar ha katei ka PHC kin don haduh 10 jingthiah na bynta ki nongpang ryngkat ki doktor bad ki nos kiba biang. La ïathuh ruh ba katei ka jaka sumar kan ai jingkyrkhu ïa kumba 22 tylli ki shnong ne kumba 20,000 ngut ki nongshong shnong.
“Dei ban ai ka jingïaroh ïa u MLA barim jongphi, Bah Hamlet halor ka jingwanrah jong i ïa kane ka jaka sumar kaba paka ban ai jingsumar. Ka long ruh kaba sngewtynnad ban ïohsngew ba dang ha ka 06tarik mynta u bnai la kha ïa i khunlung iba nyngkong ha ka Sub Centre,” ka la ong da kaba ïaroh ruh ïa ka rukom pynbit pynbiang ïa katei ka Sub Centre naduh ki jaka kha, ka jaka pynsyaid ïa i khunlung bad wat ki jaka sumar lada jia ba i kum nguid jakhlia ha ka por ba dang kha.
Ka Myntri ka la pyntip ruh ba ka por ba la buh ban pyndep ïa katei ka jaka sumar kadei ha u Nohprah 2024 ne sa kumba shisnem ei ei. Kumta ka kyrmen ba kane ka jaka sumar kan lah ban ai noh kham kloi ka jingshakri. Ha kajuh ka por ka pyntip ruh ba ha u Kyllalyngkot kan sa lum lang ïa ki doktor, naduh ki nongïalam shnong ryngkat u Bah Hamlet na ka bynta ban ïa kren kumno ban pynstet ïa ka kam.
“Kane ka jingïarap kaba poi ha ki nongshong shnong kadei kaba yn ym lah ban ñiewtang. Nga sngewnguh ïa ka shnong bad ïa ki Kur kiba ai sngewbha ïa ka jaka da ka jingngeit ba ka jingsynñiang jong ki ha ka imlang ka sahlang kan wallam ïa ka jingbha,” ka la ong.
Haba bynrap lang, u Bah Hamlet u la pynpaw ka jingsngewnguh ïa ka Myntri kaba la shimkhia hi dalade ban wan jngoh ïa ka jingpyntrei ïa katei ka PHC. “Mynshwa ka don tang ka Umthlong Sub Centre, hynrei hadien ba nga la jop kum u MLA nga la lah ban tyrwa ban pynheh ïa ka sha ka Umthlong PHC ha ka dor ba 8 klur duna. Kumba ka long mynta ka kam ka ïaid beit ïaid ryntih bad ïa kane nga ai khublei ïa ki kontraktor bad ki engineer kiba shimkhia bha ïa ka kam.,” u la ong.
U Bah Hamlet u la ïathuh ruh ba kumba long mynta hi ka jingpyndep ïa ka kam kynthup naduh ïa ka PHC haduh ka jaka sah ki nongtrei ka la kynjoh sha ka 75persen. Kumta u ong ba kim artatien shuh ba shwa ka por ba la buh ha u Nohprah 2024 kin ïoh ban pyndep noh ïa ka.
Shwa kane, Ka Myntri ka la kynduh ruh ïa i Kong T Nongkhlaw, i longkmie ba nyngkong eh ban kha khunlung ha Umthlong Sub Centre bad aiti uh ïa ki jingainsngewbha.
Ha kane ka sngi la don lang ruh naduh i Doktor H Lyndem DHS MI, Dr. SA Lyngdoh DMHO, Dr. DP Syiem Senior Medical Health Officer, Engineer ka Health Department Bah R Wanniang nalor u Rangbah Shnong Bah D Kharmon.
Shwa kane, Ka Myntri ka la kynduh ruh ia i Kong T Nongkhlaw, i longkmie ba nyngkong eh ban kha khunlung ha Umthlong Sub Centre bad aiti ruh ia ki jingainsngewbha.