Shillong, Nohprah 14 : Hadien ba ka ophis jongka Deputy Commissioner (DC) East Khasi Hills ka la ïoh jingtip ba ka don ka jingkhrong, lum bad dawa pisa na ki trai dukan bad ki nongkhaïi ha kane ka District ha ka dur jong u synñiang ne da kaba sam ïa ki shithi dawa pisa, kane ka la wanrah ka jingbym sngewtynnad na ki nongkhaïi bad ki trai dukan bad ka buh ruh ym tang ïa ki ha ka jingsyier hynrei wat ïa ki paidbah ruh.
Kumta la pynbna ba kino kino ki jinglum pisa hapoh ka East Khasi Hills lada ym dei ba la ai jingbit da ka ophis jongka DC ne kino kino ki bor sorkar la pyntip ba ki dei ki jingleh beaiñ. Lada dei kiba la ïoh jingbit ruh dei ban don ki kot jingpynsabut bad kata ruh kan long tang kat kum ka jingai por bad ai bor.
La bthah ïa baroh ki trai dukan ne kino kino ki nongkhaïi ba kin buh ïa ki CCTV ha ki jaka treikam jongki la ka long ha ki dukan, ki ophis bad ki phyllaw ïing ruh khnang ba lada don kino kino kiba don jingthmu ban leh ïa kino kino ki kam beaiñ yn ïoh ban ring dur bad bud dien ïa ki.
Kumta na ka liang jongka DC East Khasi Hills I Kong R.M Kurbah, IAS i la pynjari da ka kyndon aiñ 144 CrPC ka ban treikam naduh ba pynmih ïa kane ka hukum tad haduh ban da pynbna da kumwei pat.
