Nongpoh, Risaw 13: Ka Khasi Student Union, North Khasi Hills District Unit haka 12 tarik Risaw kala ioh ban pynkha sa 2 tylli ki shnat treikam ba thymmai jong ka seng ba kynthup ïaka KSU Paitklong Unit bad ka Khlieh Umtrew Unit kaba hap hapoh ka jingpeit jingkhmih jong ka Umsning Circle.
Ïa kitei ki 2 tylli ki Unit ba thymmai jong ka seng la leit ban pynskhem da u Samla Pynkmenlang Sanmiet Education Secretary ka KSU CEC bad u Samla James Hitler Mawphniang Legal Affairs Secretary jong ka KSU CEC u ba long ruh u General Secretary jong ka KSU NKHD Unit haka jingdonlang ki nongïalam bad dkhot ka KSU NKHD naduh u Bah Lambok Rymbai, Samla Baiashanlang Kharshanlor, Samla Jester Nongbet, Samla Herliroy Suting lem bad kiwei kiwei ryngkat ki dkhot ka Umsning Circle.
Haba kren ha katei ka sngi u Samla Pynkmenlang Sanmiet u ong ba kum ki dkhot ka KSU ngi dei ban trei lang bad ki Durbar Shnong, ki Seng Samla bad ki Seng longkmie bad ngim dei ban long ki dieng pynkiang ha ki shnong ki thaw, hynrei ban long ki samla ki don ka jingkitkhlieh naduh ka akor ka burom kumba ka seng ka ju hikai ïaki samla ban long kiba sngewrit ym ban ïaid bad leh ba heh.
U la pynkynmaw ïa ki jingïaid lynti jong ka seng naduh ba la seng ïa ka bad haduh mynta mynne, hynrei dei da ka jingïaineh bad skhem ka nongrim ki nongïalam ka seng ka dang sah bad ïeng rasong haduh mynta, u la pynkynmaw ruh ïa ki jingeh ki jingshah lehbeiñ ki jingshah ñion beiñ ki khasi jong ngi ha ki por ba mynshwa ha ki poi ei, la ha ka pule ka puthi ka kamai ka kajih hynrei dei da ka jingtrei shitom ki nongïalam ka KSU ba ki la lah ban khang lad ïakita ki jingeh kiba ka jaidbynriew ka mad.
U la pynkynmaw ïa ka jingïaid lynti bad jingshlur bad shynrang mynsiem u bah Bull Lyngdoh Bamkwai ha Dwar u Blei uba la ïalam ïa ka kynhun ban rat bad beh lut ïa ki dkhar la ha sor ha khap sor bad ha ka dong Ri Bhoi hi baroh ka wei, kumta u Samla Pynkmen u la sneng u la kyntu da kaba khot bad kyrpad ia ki Samla jong ka tei ka unit haba ki wan pynïasoh sha ka KSU ki dei ban don ka mynsiem ïaleh aiti met bad mynsiem na bynta ki dawbah ka jaitbynriew lada kim don ka bor met pyndonkam da ka bor jabieng.
Na ka liang u Samla James Hitler Mawphniang haba ai jingkren ha kane ka sngi u lah ong ba ka nongrim ba seng ïa ka KSU ha u snem 1978 dei na bynta ban ïarap ïa ki samla pule bad u lah pynkynmaw ruh ïa ka ki mat jingdawa jong ka MBOSE ha kaba ka KSU ka lah ïakhih na bynta ka bha ka miat ki samla pule bad u lah pynkynmaw ruh ïa ka jingdawa ILP ha u snem 2013 bad pyrshah lynti rel ha u snem 2017 ha kaba da ki spah ngut ki dkhot ba shitrhem ka seng ki lah shah kem bad set ha along na ka bynta ka dawbah ka jaidbynriew bad lyngba kane u lah pyn paw sha ki dkhot ba da lei lei kim dei ban tieng ban smiej ïa ka iing byndi haba ngi ieng ban ïada ïala ka jait ka kynja bad ka jingmyntoi jong ka pateng ban wan.
Ha katei ka juh ka sngi naka liang ka seng kala ioh ruh ban pynskhem ïaki nongkitkam ba thymmai jong ka KSU Umran Diary Unit.
