Shillong, Jylliew, 21 : Ka jingther jong u lapbah lapsan ha kine ki khyndiat sngi ka la wanrah ïa ka jingjulor jong ki surok bad ki lynti ki syngkien ha kiba bun ki shnong kiba hap hapoh ka Amlarem Civil Sub Division, West Jaiñtia Hills District.
Katkum ka khubor ba la iohlum na u Chief Adviser jong ka Synjuk Waheh Shnong, Amlarem Bah Kolmen Pohshna, ki paidbah ka nongshong shnong jong ka War Jaiñtia, Amlarem Sub Division baroh ki la mad jingeh ha ka leit ka wan, ka leit iew leit hat namar ka jingjur shaba palat u slap ka la wanrah ïa ka jingtwa ka khyndew bad ka jingjot jong ki surok naduh ka shnong Kharkhana shaduh Amlarem, naduh Sankhat – Lumsohrmen – Muktapur shaduh Amlarem bad kumjuh naduh Amlanai – Laremshyiap – Amsohrhong – Trangblang shaduh Amlarem bad kumjuh ka ktah ruh naduh Amkoi – Kudengrim – Nongbareh – Khonglah – Padu Bah shaduh Amlarem.
U Bah Pohshna ula ïathuh ruh ba naduh u bnai Ïaiong haduh u bnai Jylliew ki don 8 tylli ki shnong kiba la duh ïa ki Transformer bad haduh kine ki sngi kim pat ioh ïa ka bording khamtam ha kum kane ka por ba ki khynnah skul ki don hapdeng ka jingïaleh eksamin shiteng snem bad nalor kata wat ka trei ka ktah jong ki nongshong shnong ruh ka don jingthud namar ka jingbym don ka bording.
“Ka Amlarem Sub Division ka don ïa ki shnong kiba ju siew tista ïa ka bai thang bording hynrei kaba sngewsih pat ka don ka jinglip bording khah khah manla u snem ha ka por lyiur bad ngim ju ioh bording thikna da kaba biang ban pyndonkam ha ka trei ka ktah bad ka pule puthi,” u la ong.
“Ngi la leit ban ïakren bad u Engineer jong ka MeECL Jowai bad kumjuh ruh ïa u Superintendent Engineer MeECL, West Jaiñtia Hills ba kin weng lem ïa kane ka jingeh kaba ki paidbah ki ïa kynduh ha War Jaiñtia hynrei lym kumta ngim banse ba ngin ïakhih paidbah ban wad ki daw balei ba pynduh bording khah khah ïa ka Amlarem Sub Division. Lada kim lah ban pynbiang ïa ka bording ngim banse ban leit da ka sur u paidbah ban tih bad wad bniah ïa ki daw namar katkum ki juk mynta ngi donkam eh ïa ka bording ha kino kino ki kam,” u la ong.
U Bah Pohshna u la kyrpad ïa u Engineer, SE MeECL West Jaiñtia Hills bad SDO MeECL Amlarem Sub Division ba kin shimkhia kloi ban wad ki lad ki lynti ban pynioh Transformer ïa ki shnong ki bym pat ioh Transformer bad iynbïang ia ka bording ha ki shnong namarba ki Waheh Shnong jong ka War Jaiñtia, Amlarem Sub Division ki dei kiba ju iatreilang bad ka MeECL ban pynbiang ia ki jingdonkam la ka long ha kino kino ki bynta.
