Nongstoiñ, Naitung 12: U Deputy Commissioner ka West Khasi Hills Bah Garod LSN Dykes, u la pynjari da ka kyndon 144 CrPC ba mana ïa ki riew paidbah ba kin ïatur shajan ki karkhana coke ba beaiñ namar ba dang ïaid ka jingpynpra ïa ki atoskhana (chimney) jong ki karkhana beaiñ.
Katkum ka khubor, ïa kane ka hukum la pynmih naduh ka 11 tarik Naitung bad la pyntreikam mardor ha ka thaiñ. Ka hukum ka la khang pyrshah ïa kino kino ki briew kiba khlem ïoh jingbit lane ki kynhun, ba kin ïatur palat ïa ka 1 kilometer radius na ki jaka ba don ka karkhana coke ba beaiñ ha Kyllonmathei Shallang, West Khasi Hills.
Katkum kane ka hukum, u Deputy Commissioner u la bthah ban pynpra lut ploiñ ïa ki karkhana coke ba beaiñ kat kum ka Order Memo No. NDG 304/2020/Pt11/79-A dt. 02/02/2023. La ong ruh ba ka Sorkar Meghalaya ka la ai jingmynjur ban pynpra ïa ki atoskhana jong ki karkhana coke beaiñ ha ka District katkum ka shithi FOR 2/202/302 dt.4/7/2023.
Halor kane, la ai jingbthah ban pynpra ïa ki karkhana coke ba beaiñ hapoh ka District kaba sdang naduh ka 7 tarik Naitung, 2023.
Namar ka jingbym long shngaiñ ïa ka ïaid ka ieng jong ki briew bym ïoh jingbit shajan jong kine ki karkhana coke ha kane ka jingpynpra, kumta la pynjari da ka kyndon aiñ 144 CrPC.
