Pynïasoh ka Bala Devi bad ka Odisha FC

0

Shillong, Rymphang 10 : Ka Bala Devi ka la pynïasoh bad ka Odisha FC ha ka lympung ïalehkai kaban wan jong ka Indian Women’s League. Ka club ka la pynbna ïa ka jingsoi ïa katei ka thei ïalehkai football kynsai ka ri ha ka rynsan social media ha ka sngi Thohdieng. Ka Bala Devi kaba la pynïasoh bad ka Rangers FC ha u 2020 bad ka la ïalehkai ha ka Scottish League ha ki ar samoi.
Ha ki ar samoi, ka la ïoh ban mih madan tang khyndai sien bad thep ar kol, bad ka la duh mih madan na ka daw ki jingmynsaw. Katei ka thei ïalehkai shakhmat ka kylla long ruh ka thei ïalehkai ba nyngkong jong ka ri India ban ïoh thep kol ha ka jingïalehkai phutbol ha dewbah Europe.
Ka Bala Devi ka la kynduh ïa ka jingïaleh kaba khraw naduh ba ka la pynïasoh bad katei ka club na ka jingpyrkhing khangdam bad shem jingeh ban sngewthuh ïa ka ktien Scotland. Ka sien kaba nyngkong ba ka leit ban ïalehkai shabar ri kadei bad ka New Radiant WSC jong ka Maldives ha ka FAM Women’s Football Championships ha u 2014, ha ryngkat ka Oinam Bembem Devi bad ka Lako Phuti Bhutia. Ka Devi ka thep hynñiew kol ha ki 25 sien ïalehkai.
Ha u Nohprah 2022, ka Devi ka la leit ban ïalehkai ha Spain ha ryngkat ka Elangam Panthoi Chanu bad kilan met bad mih madan bad ka Malaga FC ha ka Spanish Segunda Federation. Shuwa ba kan pynïasoh bad ka Rangers FC, ka Bala Devi ka ïadon bynta lang bad ka Manipur Police, da kaba thep 26 kol ha ki 37 sien ïalehkai. Ka la mih madan nyngkong ha ka jingïalehkai national ha ka kyrdan U-17 ha u 2005 bad ha utei u juh u snem ka la mih madan na ka bynta ka kynhun ïalehkai senior jong ka India, da kaba mihkhmat ïa ka Blue Tigress ha ki 46 sien bad thep 36 kol.
Katei ka thei ïalehkai ka la pynsah jingkynmaw ha ka jingïalehkai kadei ha ka 2014 SAFF Cham-pionships, ha kaba ka la thep 16 kol tang ha ki sansien ïalehkai. Ka la jop ïa ka nam lahduh ha Manipur ha u 2014. Ka AIFF (All India Football Federation) ka la ithuh ïa ka jinglah ban ïalehkai bha jong ka bad pynkup burom da ka Women’s player of the year award. Ka la khur ïa katei ka khusnam ha ka sien kaba ar ha u 2-15.
Ka Bala Devi sa shisien kan don bynta lang bad ka kynhun ha ka jingpynkhreh ban rung sha ka Olymic kaban sdang ha u Ïaïong 2023.

Leave A Reply

Your email address will not be published.