Shillong, Naitung, 07: Ka ophis jong ka Deputy Commissioner, East Khasi Hills District, ka la kyrpad ïa baroh ki paidbah kiba ladep shondur Megha Health Insurance Scheme (MHIS) ne Smart Card jong ka East Khasi Hills District ba kin pynïasoh ïa u Aadhaar Number bad ka MHIS Card.
Ka MHIS ka la sdang ha u snem 2013 bad naduh kato ka por, ka la ai jingmyntoi ïa ki paidbah jong ka District bad ka jylla hi baroh kawei da ka jngïarap ha kaba siew lang ïa ka bailut baisep haba leit shah sumar sukher ha ki Hospital khamtam ïa ki briew kiba duk jong ka district.
Kane ka skhim mynta ka la ai jingïarap haduh T. 5,30,000 kawei kawei ka longing. Ki don da ki hajar ki longing kiba lah ïoh jingmyntoi na kane ka skhim. Hynrei mynta kim lah shuh ban ïoh ïa ka jingmyntoi na ka skhim lada kim pynïasoh (link) ïa u Aadhaar bad ka MHIS Card.
“Kumta la kyrpad ïa phi baroh ryngkat lang ki bahaing hasem jong phi kiba la don ïa u Aadhaar Card bad ka MHIS, ba phin wan shakhmat ban pynïasoh ne link ïa u Aadhaar bad ka MHIS (smart card) jong phi khnang ba phin ym duh ïa ki jingmyntoi jong ka skhim. La kyrpad ba phin wan noh kloi bad ba phin ym dier than shuh khnang ba phi lah ban ïoh jingmyntoi ha ka por ba biang,” ong u kyrwoh na ka Deputy Commissioner ka Kong RM Kurbah.
“Ngi don ka jingkitkhlieh ïa phi bad ïa ka longing longsem jong phi bad ngi kwah ban ïarap ïa phi khnang ba ma phi bad ki bahaing jong phi. phin ïoh ïa ki jingmyntoi kiba dei ka hok,” bynrap u kyrwoh.
“Phi lah ban leit sha ki ophis jong ka Block ne ha ki CHC/PHC ba don hajan jong phi ban pynïasnoh (link) ïa ka MHIS bad ka Aadhaar card,” ong shuh shuh u kyrwoh.
