Shillong, Naitung, 07: Ka Khasi Students Union (KSU) East Jaiñtia Hills District Unit, ha ka sngi thohdieng ka la dawa ïa ka Jaiñtia Hills Autonomous District Council (JHADC) ba kam dei satia ban ai No objection Certificate (NoC) sha ka North-east Frontier Railway (NFR) ne sha ka Sorkar ban pynpoi ïa ka lynti Rel ha Khliehriat, East Jaiñtia Hills District katba ka Sorkar kam pat lah ban wanrah ïa ki aiñ kiba khlaiñ kiba ïada na ka jingwan tuid kyrthep jong ki briew kiba nabar sha ka jylla Meghalaya.
Ha u kyrwoh ba la phah sha ki lad pathai khubor, ka seng ka la pynpaw ba kan sa aiti da ka jingthoh sha ka Council ha ka taiew ban sa wan namarba ïa mynta ka dang don hapdeng ka shuti Behdeinkhlam.
Kane ka jingpyrshah jong ka seng ka long shisngi hadien ba u Myntri Rangbah ka jylla u Conrad K. Sangma u la pynbna ba ka lah don biang ka jingthmu ban wanrah ïa ka lynti rel ha ka thaiñ East Jaiñtia Hills District.
“Ka jingthmu jong ka seng ban pynsngew sha ka Jaiñtia Hills Autonomous District Council ka long halor ka nongrim ban kyntu ïa ka Council hi baroh kawei ba kan pyrkhat rangbah bad ban ym ai NoC ïa ka NFR kaba dei ban khmih ïa kane ka projek. Ka seng ka banjur ïa ka District Council kaba long ka stieh ïada jong ka jaidbynriew ka dei ban pyrkhat sani bha halor kane ban nym ai satia ïa ka NoC. Ka seng ka khmihlynti ba ki nongïalam bad ki nongmihkhmat jong ka JHADC kin dei ban don kajuh ka sur halor ka lynti Rel,’ ong u kyrwoh na ka seng ba la soi da u President ka KSU-East Jaiñtia Hills u Bah Streamly N. Suchen.
Ka seng ka la aiti ruh da ka jingthoh sha ka Sorkar lyngba u Deputy Commisisoner u Abhilash Baranwal ban pynpaw ïa ka jingpyrshah jong ka seng ban pynpoi ïa ka lynti Rel ha East Jaiñtia Hills District.
“Ka seng ka iengskhem halor kane ka mat katba ym pat don ki aiñ kiba khlaiñ ban ïada ïa ngi kum ka jaidbynriew ritpaid, ka jingïakren halor ka lynti Rel kan sangeh shwa. Ka seng, naduh u snem 1988 ka la pyrshah ïa kane ka jingthmu jong ka Sorkar ban iuhroit ïa ka jaidbynriew bad kan ïai pyrshah katba ka Sorkar kam pat pyrkhat thymmai ban wanrah ïa ki aiñ kiba khlaiñ ban ïada ïa ngi,” ong u kyrwoh
“Kum ban shu pynkynmaw, ka Sorkar ka la pyrshang ban pyntrei ïa kane ka project na Tetelia sha Byrnihat hynrei ka seng ka la pynpulom ïa kane ka jingthmu da kaba pyrshah jur bad pynsangeh ïa kane ka projek ha u snem 2016,” u la ong.
Ka seng ka kyntu ruh ïa ki Dorbar Shnong, ïa ki paidbah bad khamtam ïa ki MLA bad MP ba kin ïatreilang halor kane ka kam bad bynrap ruh ba ka seng kan nang ïai buddien ïa kane ka kam bad shim ruh ki lad ki lynti ban pynshai sha u paidbah halor ka jingma kiba ap lada wan ka lynti Rel.
“Ka seng ka sngew ban pynpaw ruh sha ka Sorkar ba kam dei ban kyrkieh ïa ka lynti Rel hynrei ban wanrah shwa ïa ka roi ka par sha ki paidbah ka thaiñ naduh ka surok, ka koit ka khiah, ka pule ka dangle bad kumta ter ter,” la bynrap u kyrwoh na ka seng.
Ki nongïalam ka seng ha ka jingïakren bad u Deputy Commissioner jong ka East Jaiñtia Hills District ki la pynpaw ïa ka jingpyrshah ban wanrah ïa ka lynti Rel namarba ka seng kam kwah ba ka East Jaiñtia Hills District kan long ka khyrdop ïa ki mynder ri kumba la jia ha ka jylla Assam kaba bun ki mynder ri kiba rung ba mih lyngba ka Assam kumba long ka Karimganj.
“Ngi la kren shai ïa u DC katba ka jylla Meghalaya kam pat biang ïa ki aiñ ki ban ïada kumta ngin nym ailad ban wanrah ïa ka lynti Rel,” la ong u nongïalam ka KSU.
