Shillong, Risaw, 01: Ka Central Bureau of Communication (CBC), tnat Information and Broadcasting, Sorkar India, Regional Office, (MT Region), Shillong ka la pynlong ïa ka jingpyni dur bad jingai jingtip kaba ar sngi ban rakhe ïa ka Azadi Ka Amrit Mahotsav ha skul bah North Eastern Hill University (NEHU).
Kane ka jingpyni dur, kaba pynlong ha ka jingïatreilang bad ka Pro Bono Associates Club, Dept. of Law, NEHU, ka pyni ïa ka jingïakhih ka India na ka bynta ka jinglaitluid lyngba ki thup jong ki dur. Ka bynta kaba kyrpang ha kane ka dei kaba la aiti sha ki 8 Snem ka Seva, Sushasan, Garib Kalyan ha kaba la pyni ïa ki jingjop ka Sorkar ha ki kam bapher bapher ha ki 8 snem ba kynthup ruh ha ka Thaiñ Shatei Lammihngi.
U Vice Chancellor, NEHU, Prof. Prabha Shankar Shukla u la plie ïa kane ka jingpyni dur mynta ka sngi ha ka NEHU Community Hall. Ha ka jingai jingkren jong u, u Prof. Shukla u la ïaroh ïa ka sienjam jong ka CBC Shillong ban pynlong ïa kane ka prokram bad u la kyntu ïa ki shah hikai ba kin leit jngoh ïa kane.
U la ong ba ka jingthmu jong kane ka jingpyni dur ka dei ban ai jingtip sha ki briew shaphang ka bynta jong ki riewkhraw kiba la ïakhun na ka bynta ka jinglaitluid ka ri. Ka jingthmu ka dei ruh ba kin tip shaphang ka histori bad ka deiriti kaba riewspah jong ngi. U la ong ba u dap da ka jingsngewnguh ïa ka CBC, Shillong kaba la pynlong ïa kane ka jingpyni dur da kaba bynrap ba kane kan ïarap bha ban ai jingtip ïa ki briew bad khamtam ki shah hikai shaphang ka jinglenlade jong kine ki riewkhraw na ka bynta ka jingbha jong ka ri.
“Lyngba kine ki dur ba la pyni hangne, ngi lah ban ïoh jingtip shaphang ki khlawait ki bym pat da paw jong ka Thaiñ Shatei Lammihngi kiba la ai bor bad mynsiem na ka bynta ka jinglaitluid jong ka India,” u la ong.
U la kynmaw ruh ïa ki khlawait ka Meghalaya – u Tirot Sing, u Kiang Nangbah bad u Pa Togan Sangma bad u la ong ba ka ri baroh kawei ka dei ban tip shaphang ka jinglenlade jong ki. U la kyntu ruh ïa kito kiba la wan ïashim bynta ha kane ka prokram ba kin bteng ïa ka jingthmu jong kito kiba la ïakhun na ka bynta ka jinglaitluid.
U Director, ka CBC, Shillong, Engame Pame u la batai bniah shaphang ka rukom trei ka CBC ha ka thain. U la ïathuh ruh shaphang ki kam bapher bapher ban dang pynlong khnang ban ai jingtip ha ki jaka nongkyndong. U Pame u la ong ba yn pynlong ïa kine ki prokram khnang ba ki briew kin lah ban ïoh jingmyntoi na ki kam ka Sorkar kiba ïadei bad ka bha ka miat.
U Prof H Mishra, Director, UGCHRDC, NEHU ha ka jingai jingkren jong u halor ka phang, ‘Ka jingkyntiew ïa ki samla, ka sienjam sha ka India kaba lah ban kyrshan ïalade’ u la batai kumno ki samla ka thain ki lah ban ïadon bynta ha ka jingpynurlong ïa ka Atma Nirbhar Bharat.
Kane ka jingpyni dur ka dei shi bynta ki kam ba pynlong da ka CBC, Shillong mynta u snem kum shi bynta ka jingrakhe ïa ka jingdap 75 snem ka jingïoh jinglaitluid. Ka jingthmu jong kane ka prokram ka dei ban kyntiew jingtip ha ki briew shaphang ki sienjam bad ki prokram ka Sorkar India na ka bynta ka bha ka miat. Ka dei ka jingpyrshang ban pynsngewthuh ïa ki briew shaphang ki jingthmu ka Amrit Mahotsav bad kumno ki briew ki lah ban ïashim bynta ha kane.
Kiwei kiwei kiba ïadon lang ha kane ka sngi ki long u Prof. K Debbarma, Dean of Social Sciences, NEHU, Dr R K Mishra Nodal Officer, Pro Bono Associates Club, Dept of Law, ki samla pule ka NEHU na ka law department, NEHU. Baroh ki briew ki lah ban leit jngoh ïa kane ka jingpyni dur haduh ka 30 tarik u Nailur, 2022. Yn pynlong ruh ïa ki jingïakhun tainia (debate) bad ka jingïakhun ha ki jingrwai ieid ri ha kine ki ar sngi jong kane ka prokram.
