Dang pynkhreh ka Sorkar ban tei ïa ki Cinema Hall ha ki District ka Jylla: Bah Prestone

Shillong, Risaw, 01: U Symbud Myntri Rangbah ka Jylla u Bah Prestone Tynsong ha ka sngi Palei u la ïathuh ba ka Sorkar Jylla ka dang pynkhreh ban tei ïa ki Cinema Hall ha ki distrik bapher bapher ka jylla khnang ba kan pynsuk ïa ki paidbah kiba kwah ban peit ïa ki phlim Khasi kiba mih na ka por sha ka por.
U Bah Prestone u la pynpaw ïa kane haba kren ha ka jingpyllait paidbah ïa ka poster jong ka phlim “Ahor” ba la pynmih da u Bah Hilarius Kharbihkhiew.
Ha ka jingpyllait paidbah ïa ka poster jong ka phlim Ahor, la sakhi lang da u Bah Hilarius Kharbihkhiew uba dei u Producer, u Bah Kenny Lyngdoh uba dei u Director, u Bah Vommander Shangpliang u ba dei u President jong ka Meghalaya Film Association (MeFILMA), u Bah Joel Marbaniang uba dei u SDO jong ka Pynursla Civil Sub Division, u Gautam uba dei u trai ka Bijoy Cinema Hall, ki tyngshop, ki puron, ki nongput nongtem, ki nongrwai bad ki nongshad jong ka kynhun Wanz Dance Evolution.
U Bah Tynsong u la ai khublei ïa u nongshna jong kane ka phlim uba la trei shitom ban kyntiew ïa ka sap ka phong jong ki khun samla kiba don bynta ha kane ka phlim bad u la ai ka jingïaroh ïa ki nongak bad ki nongrwai nongshad kiba la shim ïa ka bynta kaba kyrpang ban kiew ha ki rynsan.
Ha kaba ïadei bad ka jingkwah jong ka karkhana pynmih phlim na Ri Lum khasi Jaintia, u Bah Prestone u la ong ba ka sorkar kan sa sdang ban pynheh bad ban pynbun ïa ki Cinema ha Shillong bad ha ki district ki bapher bapher ba don ha ka jylla
U Symbud Myntri Rangbah u la ong ruh ba ka karkhana shna phlim kan sa nang kiew irat ha ka jylla namarba ka Sorkar ka la thmu ban pynheh noh ïa ka jaka ha Them Iew Mawlong hadien ba ladep ban pynkynriah ïa ki briew kiba sah ha Sweepers Lane.
Kum ban shu pyntip hangne, ïa ka phlim AHOR la ringdur naduh u snem 2019 hynrei namar ka jingwan lynshop jong ka ka khlam COVID-19, ïa ka jingringdur la pynsangeh noh shuwa bad la bteng biang ban ring dur ïa kane ka phlim ha ki bynta jong ki jaka jngohkai kiba don ha Khasi bad Jaiñtia.