Pyni bor ka Sorkar, na EJH bad Ribhoi yn khang kdong ban khanglad ïa ka jingwan tuid u drok

Shillong, Naiwieng 14 : Ka sorkar jylla ha ka sngi Palei ka la shim ïa ka rai ban pyni noh da ka bor ha ka jingïakhun pyrshah ïa u drok da kaba kan buh noh da ki jaka talasi ïa baroh ki kali kiba rung sha kane ka jylla khnang ba ki nongkhaii ne ki nongsuplai drok kin ym ïoh shuh ban rung laitluid katba ki mon.
Ïa kane ka rai, ka sorkar ka la shim ha ka jingïalang kaba la lum da u Symbud Myntri Rangbah ka Jylla Bah Prestone Tynsong ryngkat u Myntri ka tnad Social Welfare, Bah Paul Lyngdoh nalor ka DGP Kong I Nongrang kumjuh u Mission Director jong ka DREAM, Bah FG Kharshiing bad kiwei kiwei ki heh sorkar.
Haba kren bad ki lad pathai khubor hadien ba la wai ka jingïalang, u Bah Paul u la pyntip ba ka jingïalang ka la rai ba ïa kitei ki jaka talasi ba kyrpang yn buh ha Ri Bhoi kumjuh ha East Jaintia kiba dei ki jaka rung jaka mih kiba kongsan tam ha ka jylla.
Katkum ka jingïathuh jong u, kine ki mashin kin lah ban talasi ïa baroh ki kali kiba ïaid lyngba bad ban pyni dak ruh lada don ki kali ba kit ïa ki kynja drok.
“Ngi khmih lynti ba ha ki 5 bad 6 bnai ngin sa lah ban pynurlong noh ïa kine ki jaka talasi,” u la ong bad bynrap ba na bynta ban pynïaid ïa kitei ki mashin donkam ruh ki briew kiba la don ka jingtbit ban pyntreikam.
Nalorkane, u Myntri u ong ruh ba ka jingialang ka la rai ruh ban pynkhlaiñ shuh shuh ïa ka jingtreikam jong ki Village Defence Party da kaba wanrah ïa ka jingpynkylla bad pynbha shuh shuh ïa ka Meghalaya Police Act, 2010.
“La ïa kren ruh ban pynkhlain shuh shuh ïa ka Anti-Narcotic Task Force ba kan kham donbor bad kham bun briew. Ïa kane la aiti ha i DGP ban phah ïaka jingtyrwa bad ban wanrah pat ha ka jingïalang jong ka kynhun myntri kaban sa long,” bynrap biang u Myntri.
U Bah Paul u la ïathuh ba la ïa kren ruh na ka bynta ban thied kham bun ki ksew sma-dien nalor ki saw tylli kiba la don lypa na ka bynta ban pynkhlain shuh shuh ïa ka jingtreikam.
La ïathuh ba kawei pat ka mat ba ki ïa kren ka long h aba ïadei bad ki fast track court. “Haba iadei bad kine, kine ki dei ki court kiba ngi kwah ba kin shong man ka sngi ban bishar ia ki mukoduma”. Halor kane u ong ba ka sorkar jylla lyngba u Myntri Rangbah kan ia kren bad ka Meghalaya High Court.