Pynhap pyrda ka SSSM ïa ka 1st 34 Yrs Above Inter House Football Tournament 2024 ha Mawkohphet

Mawkyrwat, Nohprah 23: Ka Seng Samla Shnong Mawkohphet (SSSM) ka la pynhap pyrda noh ïa ka lympung ïalehkai kynjatbol ba la tip kum ka 1st 34 Yrs Above Inter House Football Tournament 2024 ba la pynlong da ka Mawkohphet Sport Club ha hapoh ka Madan ïalehkai jong ka Shnong Mawkohphet, South West Khasi Hills District.
Ka jingpynlong ïa kane ka jingïalehkai ka long kum shibynta ban lum ïa ki Rangbah kiba la sdang noh karta ban kin ïoh ki met ba koit ba khiah bad kum shibynta ban leh kmen Advance Christmas.
Haba phai ha ka jingïalehkai ka la long da shisha ka jingïaleh kaba shit ba shngaiñ ha kaba baroh ki nongshong shnong ki la wan ban peit bad pynshit pynshngaiñ bad jingkyrshan pura ïa la ki jong ki kynhun. Ka jingïalehkai phainal kaba ki nongpynïaid ki la buh kyrteng da ki ktien nongwei kata ka la long hapdeng ka France pyrshah ïa ka Portugal, ha kaba ka Portugal ka la pynliem ïa ka France da 3 – 0 kol namar ha ka kyllastep ka jingïaleh ka long mar ïakhiat hynrei ha ka kyllamiet ki ‘rangïalehkai jong ka Portugal la ñion bad lah syndon ban thep haduh lai tylli ki kol.
Ïa ki kol jong ka Portugal la thep da u Bostarland Marngar 2 kol, bad na u Rojester K. Kharai 1.
Lah ban pynkynmaw ba baroh ki kynhun kiba ïashimbynta ha kane ka 1st 34 Yrs Above Inter House Football Tournament 2024 ki long 6 tylli kata France, Germany, Portugal, Spain, Brazil bad Argentina ha kaba ka Argentina ka la ïoh khur ïa ka 3rd Place da ka jingpynliem ïa ka Spain 5 – 1 kol.
Ha kane ka sngi u bah Jesslanroy Nongsiej kum u kongsan ha ka jingïadonlang u Assistant Rangbah Shnong, u bah Pleskingroy Iawphniaw kum u symbud kongsan bad kiwei kiwei de ki riew rangbah jong ka shnong.
Kane ka long katkum ka khyrwoh ba la phah da Secretary jong ka Seng Samla Shnong Mawkohphet, u bah Clever Kharsyiemiong.