Jowai, Ïaïong 25: Ka Kñia Ryngkaw bad ka Nohsakyriat ka Raij Ïalong-Wahïajer kaba ju long shisien shisnem ha u bnai April (Ïaiong) shwa ban bet ïa u Kba ha ki Hali ki Pynthor jong ki, ka la poi sha kaba kut mynta ka sngi da ka jinglehkmen Nohsakyriat ha madan Ryngkaw Ïalong.
Ka jingpynkhreh ïa kane ka kñia Ryngkaw bad Nohsakyriat ka la sdang naduh ka 17 tarik mynta u bnai, ha kaba ki Wasan (Longsan) ki lum ki lang ïa u synniang u bynhei, u khrong u tri na ki khun ki hajar jong ka Raij da u khaw lane da ka pisa kata kaba ki ai. Na une u synniang u bynhei ki shet pyrnah ban suit ban shor ha ka kñia ka khriam ka duwan ka dupat jong u Ryngkaw u Basa uba long u Blei nongda nongker ïa ka shnong ka thaw bad ïa ka Raij ka Mulut.
Ïa ka kñia Ryngkaw ki la pyndep hynne ka sngi (25/04/2025) dang step phyrngap shwa ban mih ka Sngi da ka kñia la ne khat uwei u ‘yiar Ryngkooh uba la jied kynsai. La ong ruh ba une u Ryngkaw u dei hi u Blei uba ker uba da ïa ka shnong ka thaw, ka Raij ka Muluk na ka khlam ka ngoh, ka myntoi ka maïa, na ka tyrut ka smer bad na kiwei de ki jingsniew.
Hadien ba la dep ka kñia Ryngkaw ki wan shisyndon sha ïing u Langdoh bad ai jingkñia da kawei ka ‘yiar kynthei kaba la jied kynsai ïa ka Syiem Duwan, kaba long ka ‘Lei apïing kaba da kaba ker ïa ki longïing longsem jong ka shnong ka thaw ka Raij ka Muluk. Na ki dak ki shin u jingkñia la sngewthuh ba u Blei, ki Blei ki la pdiang hun ïa ka Nguh ka Dem bad kum ka dak ka jingkmen la pynlong ïa ka Nohsakyriat ka jinglehkmen ha ka hok katkum ka hukum.
Ïa kane ka jinglehkmen Nohsakyriat la wan plie da u Executive Member ka JHADC Bah Jesse Suiam kum u kongsan, katba u Dalloi Chanki Langbang, Dalloi ka Elaka Shangpung kum u symbud kongsan.
U Bah Jesse Suiam haba kren ha kane ka sngi u pynpaw ïa ka jingkmen ba ka Raij Ïalong-Wahïajer bad Nongkhyllem ki nongshong shnong jong ka kiba dang lah ban bat hi triang ïa kane ka Nohsakyriat kaba long kawei kawei na ki dustur (Culture) kaba la saiñdur da ki longshwa ban shwa ïa ki longdien jong ka Raij. La katta ruh u ong ban nang pynneh pynsah ïa kane ka Nohsakyriat na ka bynta ka pateng ka ban dang wan ka shong ha kti jong ki Samla ba mynta.
Khaw ha shwa la ïoh ïa ka jingkren na u Dalloi Chanki Langbang, ka jingkren bad ka sneng ka kraw kiba sngewtynnad, ha kaba ïadei bad kane ka Nohsakyriat bad ka kñia Ryngkaw kñia Basa.
La ïoh ïa ka jingkren maitphang shaphang ka Nohsakyriat da u ma Lehbha Phawa. Ïa ka jingïalang la pynïaid da u ma Pyrkhat Shylla, President ka Sein Raij Ïalong-Wahïajer.
