Nongpoh, Jymmang, 06: Ka Northeast Institute of Professional Studies (NEIPS) hapoh ka jingïalam u Bah Michel Thongni, CEO ryngkat ka jingkyrshan ka SKILLS Meghalaya mynta ka sngi pynkup burom ïa 8 ngut ki samla kiba la pyndep ka jinghikai ha ka prokam Commis Chef.
Ïa kane ka jingpynkup burom ïa kitei ki 8 ngut la pynlong ha iing Dorbar Sajer ryngkat ka shithi thung kam kaba dei ruh ka lynti ba kin rung sha ki kam ba ki sdang ban trei ha kylleng ki jaka bad ki jylla bapher bapher
Ha katei kajuh ka sngi la ai jinghikai ruh shaphang ki skhim bapher bapher bad ki ram kiba lah ban ïoh ban ïarap ïa ki ban sdang ïa la ki jong ki kam da ka jingthmu ban hikai ïa ki ha ka por ba shem jingeh ban ïohkam, hynrei ba ki lah pat ban ieng hala ki jong ki kjat bad ban long ki nongseng kam lajong.
Ha kane ka prokram la ai jingkren da ka Kong Beneta Muktieh kaba dei ka Assistant Industries Officer ka District Commercial Industries Centre (DCIC) jong ka Ri Bhoi District bad ka Kong R. Mawphniang kaba mihkhmat na ka Meghalaya Rural Bank.
Ka Kong Liphidia Kharbuki, Centre In-Charge ha NEIPS, ka la pynpaw ïa ka jingsngew sarong ïa ki jingjop jong ki samla kiba la dep ban pyntbit bad shah hikai kaba la ban jur ruh halor ka jingdonkam ban pyniar ïa ka jingmut jingpyrkhat bad kumjuh ban long kiba stad ha kaba ïadei bad ka kamai kajih ha kum kane ka juk ba ki samla kim dei ban ap tang ïa ki kam sorkar.
Katei ka jaka pule ka ai ïa ki jinghikai bapher bapher, kynthup ïa ka Sofa Lead, ka shet jingshet, ki rukom pynbhabriew, suh jaiñ, bad kiwei kiwei. Na ka liang kitei ki samla kiba la pyndep ïa ka jinghikai ki la pynpaw ïa ka jingsngewnguh kaba khraw na ka bynta ki jinghikai bad ki lad ba la ai da ka NEIPS ryngkat ka jingkhublei ruh ïa ka institute kaba la pyntbit ia ki da ki sap kiba don na ka bynta ka lawei jong ki.
