Pyndait shwa ïa ki smart meter ha ki karkhana ne jaka sorkar : FKJGP

0

shillong, Jymmang 23 : Ka FKJGP ka la kyntu ïa ka sorkar jylla ba lada ka kwah shisha ban ïohi ïa ka jingïohnong na ka jingpyndait ïa ki smart meter kadei ban sdang shwa ban leit pyndait ha ki karkhana, nangta ha ki quarter jong ka sorkar jylla bad ruh ha kiwei kiwei ki jaka treikam jong ka.
Haba kren bad ki lad pathai khubor hadien ka jingkynduh ïa u Symbud Myntri Rangbah ka Jylla ba dei peit ïa ka tnad Bording, Bah Prestone Tynsong, u Working President jong ka seng, Bah Dundee Khongsit u la ong, “Ka sorkar ka la dei ban leit pyndait shwa ha ki karkhana, ki quarter jong ka sorkar bad ha ki tnad treikam bapher bapher, lada ka kwah ban ïohi ïa ka jingïohnong na kaba pyndait ïa ki smart meter.”
U la ong ruh ba kaei kaba mih nangtei, ki lah pat ban pynshai ïa ki paidbah ba ka don ka jingïohnong bad dei hangta ki paidbah kin sa lah ban pdiang ban pyndait ïa ki smart meter ha ki iing jong ki.
La ïathuh ba na ka liang u Symbud Myntri Rangbah u la ong ba u sngewtynnad ïa katei ka jingai jingmut jong ka seng bad shen un sa bthah ïa ka tnad bording ban sdang shwa na ki iing sorkar.
Shwa kane, u Bah Dundee u la ïathuh ruh ba ha ki arsnem mynshwa ka dor jong u smart meter ka long 3,750 tyngka uwei hynrei ha kine ki khyndiat bnai pat la ong ba ka dor ka dei hapoh 5,000 tyngka.
“Haba ïadei bad ki smart meter u Symbud Myntri Rangbah u la pynshai ba ka tender ba ki khot bad dor kaba pan da ki kompeni . Kine ki kompeni ruh kidei kiba la ïoh jingithuh ne mynjur da ka Central Electrical Authority of India bad ong ba dei tang ki kompeni ba don ïa katei ka certificate ki lah ban shim bynta ha katei ka jingthep tender,” u la bynrap shuh shuh.
La ïathuh ruh ba na ka liang u Symbud Myntri Rangbah u la dep ban pynshai ha ki ba ka rukom jied ïa ki kompeni ba dei na ka bynta ki smart meter ruh kadei da ka lynti kaba khuid bad kaba shai.

Leave A Reply

Your email address will not be published.