Nongstoiñ, Rymphang, 18: Khnang ban wanrah ïa ka jingthep bad niew vote kaba laitluid, kaba khuid kaba suba bad kaba seisoh na ka bynta ka election jied nongmihkhmat sha ka ïing dorbar thaw aiñ, u District Election Officer (DEO) ka West Khasi Hills bah Garod LSN Dykes (IAS), katkum ka bor ba la pynkup ha ka section 135 C jong ka R.P Act 1951, u la pynbna sngi tyrkhong kyiad ha baroh kawei ka District, kata naduh ka por 4 baje janmiet jong ka 25 tarik haduh ka 4 baje janmiet jong ka 27 tarik Rymphang 2023.
Nangta kan bteng biang naduh ka 7 baje janmiet jong ka 1 tarik u Lber haduh ka 7 baje janmiet jong ka 2 tarik Lber 2023. Kumta baroh ki dukan die kyiad (Country Spirit and Foreign Liquor) Outs till, Bars bad baroh ki dukan kyïad ba la ïoh laisen kin khang dam lut ha kitei ki sngi ba la kdew haneng.
Ha kawei pat ka bynta jong ka khubor, u District Election Officer (DEO) bad Deputy Commissioner ka West Khasi Hills, u la pyntip ba ka 27 tarik u Rymphang, 2023 kaba dei ka sngi thep vote kan dei ka sngi shuti. Kumta baroh ki Bank, Magisterial Courts, Central/State Government Offices, Central/State Undertakings bad ki Industrial Units, kin khang lut ha katei ka sngi namar ka Election ban jied ïa ki nongmih khmat sha ka ïing dorbar thaw aiñ.
