Pynbna u CM da ka Scholarship ba 6000 tyngka shi bnai sha palat 80,000 ngut ki samla pule

Shillong, Lber 05 : U Myntri Rangbah ka Jylla Conrad K Sangma u la pynbna ban pyntreikam noh ïa ka Chief Minister’s Scholarship scheme, ka flagship program ba thymmai ka Jylla ka ban ai jingmyntoi ïa kumba 80,000 ngut ki samla naduh ka snem mang tyngka ban wan.
Haba kren bad ki lad pathai khubor u Myntri Rangbah u la pyntip ba ki samla pule ka jylla kiba la dep pass ïa ka matrik kin ïoh ia ka jingkyrshan pisa kaba long 6000 tyngka man u snem khnang ba kan long ka jingkyrshan ïa ki ba kin lah ban bteng ia ka jingpule.
U pyntip ba ka Sorkar kala mang haduh 48 klur ban pyntreikam ïa kane ka skhim naduh ka snem mang tyngka ban wan.
Ha kajuh ka por u la pyntip pat ba ka kane ka scholarship kadei ka jingkyrshan pisa kaba ka sorkar jylla hi kan ai. “Kumba phi tip ba ka sorkar pdeng ka ju ai ïa ka scholarship sha ki samla pule lyngba ka Tribal Affairs Ministry bad Ministry of Home Affairs bad kiwei ki tnad sorkar. Hynrei kine ki jingkyrshan pisa teng teng ka rukom poi kam long tikna bad haba ki poi ki pyllait ha ki installment. Kumta, kane ka buh jingeh ïaki samla pule jongngi. Ngi la kren bad ka sorkar pdeng bad ki ïai bteng ban pyllait pisa khyndiat khyndiat bad kumta don kiba la ïoh bad don ki bym pat ïoh. Kumta, kane ka buh jingeh ïa baroh,” u la ong.
U Myntri Rangbah u la ïathuh ruh ba bun ki samla pule ki la kylli ïa u bad u la ïoh ban pynshai ha ki ba kane kadei ka jingai na ka sorkar pdeng bad watla ki buddien ruh kim pat pyllait.
“Kumta da kaba buh ïa kane hakhmat, ngi sngew ba ki samla pule, khamtam haba nga ïoh ïa ka jingpynsngew na ki ba ki donkam shisha ïa ka jingkyrshan pisa, watla ngin ym lah ban kyrshan pura ïa ki hynrei katto katne ka jingpyrshang na ka liang ka sorkar kan ai mynsiem ïa ki ba kin bteng ïa ki jingpule kiba kham shajrong,” u la ong da kaba bynrap ba dei na kane ka daw ba ki la wanrah da kane ka skim.