Pynbna u Bah Paul 29 klur ban kyntiew ïa ki jaka jngohkai pyrthei ha ki san shnong ha EJH

Khliehriat, Jymmang, 06: U Myntri ka Sorkar Jylla uba khmih ïa ka tnat Jngohkai Pyrthei Bah Paul Lyngdoh ha sngi Baar u la pynbna sha ki paidbah ïa ka song pisa T 28.25 klur, kaba la kot jan haduh T 29 klur kaba la mang ban kyntiew ïa ki jaka jngohkai pyrthei ha ki thaiñ san shnong kiba don ha East Jaiñtia Hills District.
U Bah Kyrmen Shylla ruh uba dei u nongmihkhmat ka thaiñ uba la don lang ha ka prokram kaba la long ha ka shnong Mukhaialong, East Jaintia Hills District, u la kubur ba kane ka dei ka sien kaba nyngkong ba ka East Jaiñtia Hills District ka ïoh ïa ka mang tyngkata kaba la kot haduh T 28.25 klur na ka tnat jngohkai pyrthei ne tourism kata naduh ba ïoh jylla naduh u snem 1972.
U Bah Paul u la ong bad pynsngew ba na ka bynta ban kyntiew ïa ka jaka ba don ka kshaid Umbyrleiñ ha shnong Rangad, la pynbna ïa ka song pisa kaba T5.79 klur tyngka, na ka bynta ka jaka ba don ka kshaid Rynji, ha shnong Cham Cham, la pynbna ban ïoh T 9.64 klur, na ka bynta ban pynbha ïa ka jaka ba don ka kshaid Moopun ha shnong Mutong la pynbna ban ïoh T6.44 klur tyngka, kumjuh ruh ban kyntiew ïa ka jaka jngohkai pyrthei ka Sahksaw kaba don ha shnong Cham Cham, la pynbna ban ïoh ïa ka mang tyngka kaba T 8.38 klur bad baroh ka pisa ka la jan poi sha ka T 29 klur tyngka.
Haba kren halor ki dorkhas ne ki memorandum ba la ai da ki nongsynshar shnong jong ki san shnong, u bah Paul Lyngdoh u la ong “u kpa uba sngewthuh u khun um da donkam ban pan, kumta nga ruh nga la leh kumta bad wanrah ïa kine ki song pisa ban kyntiew ïa ki jaka jngohkai pyrthei ha kine ki san shnong”
Na ka liang u bah Kyrmen Shylla u la ong ba baroh kine ki shnong ba kynthup ka Mutong, Mukhaïalong, Chamcham, Lumshyrmit, Pynthorsale ki don ka jingangnud ban kyntiew ïa ka kam jngohkai pyrthei bad u la ong bad pynsngew biang ba na ka liang jong u un sa pynïoh sa kawei ka surok na kine ki san shnong ka ban pynïasoh bad ka war Jaiñtia kaba sha West Jaiñtia Hills District ban pynsuk ïa ki nongwan jngohkai pyrthei kiba wan sha kitei ki san shnong.
Kumjuh ruh na ka liang u MDC ka thaiñ, u bah Lasky Rymbai, u la kular ban ai jingïarap T5 lak tyngka ban kyntiew ïa ka thaiñ jong ki san shnong kiba don ha East Jaiñtia Hills District.
Kiba la ai jingkren ki kynthup ruh u MLA Ranikor, u bah Pius Marwein, u MDC ka thaiñ, u bah Lasky Rymbai, u BDO Wapung C&RD Block, u Dr T. Shylla bad kiwei kiwei.
Kiba la ïa don ryngkat lang ha kane ka prokram ki kynthup ruh u Waheh shnong mukhaïalong, u bah Hundred Phawa, waheh shnong Cham Cham, u bah Karlud Dkhar, Waheh Shnong Lumshyrmit, u bah Kiyo Dkhar, Waheh Shnong Mutong, u bah Marchi Dkhar, Waheh shnong Pynthorsale, u bah Yoki Phawa, u Secretary San Shnong, u bah Tyrnit Pdein, u president san shnong welfare association mukhaïalong, u bah Bitral Dkhar, u bah Fansis Swer bad kiwei kiwei ki riew rangbah.