Dawa ka KSU ïa ka NEIGRHIMS ban khot jingïalang ka Governing Council halor ka kam thung nurse

Shillong, Jymmang 06: Ka Khasi Students’ Union (KSU) ha ka sngi baar ka la dawa ïa ki bor pynïaid jong ka North Eastern Indira Gandhi Regional Institute of Health & Medical Sciences (NEIGRIHMS) ba kan khot kyrkieh ïa ka jingïalang kaba kyrpang jong ka Governing Council jong ka ha kaba ïadei bad ki kam thung kam nurse ha kane ka jaka pule.
Ha ka shithi ba la phah sha u Director ka NEIGRIHMS u Dr N Mehta, u President ka KSU u Bah Lambokstarwell Marngar u la ong, “Ngi kyrpad ïa phi ban sdang noh ïa ka jingkhot jong ka jingïalang kaba kyrkieh jong ka Governing Council khnang ban lah ban pynbeit ïa kine ki jingeh kiba ïadei bad ki kam thung kam nurse ha kane ka jaka pule.”
Ha kaba ïadei bad kane na ka liang jong u Bah Marngar ula ong ba ka jingïalang ba la khot da u myntri ka sorkar u Bah Paul Lyngdoh bad ki bor pynïaid jong ka NEIGRIHMS bad ka KSU kaba la long ha ka sngi baar ki la shim ïa ka rai ba yn pynsangeh shwa ïa ki kam thungkam tat haduh ba ki jingdawa jong ka seng la lah ban pynbeit.
U la ong ruh ba la shim ïa ka rai ba ka NEIGRIHMS kan sa pynbeit ïa kine ki jingeh ha la ka jinglah jong ka bad haba ïadei pat bad kiwei ki kam kiba ym lah ban rai da ka NEIGRIHMS yn hap ban wanrah sha ka meij jong ka Governing Council bad ka Ministry of Health & Family Welfare, ka sorkar pdeng.
Na ka liang jong u Bah Marngar u la kyrpad ïa ki bor pynïaid jong ka NEIGRIHMS ban shim ïa ki rai ïa kiba kum kiei ki kam ba lah ban pynbeit hapoh kane ka jaka pule bad kiei pat ki kam kiba lah ban buh hakhmat jong ka Governing Council ne ka Ministry na ka bynta ban lah ban shim ïa ki rai kiba biang.
Ki mat kiba hakhmat eh ba la buh da ka KSU ha kane ka jingshong kyllaiñ myngngor kaba khlem buh por ki long ïa ka rta thungkam nurse kaba la buh mynshwa da 35 snem ka rta ha kaba ïadei bad ka kam nursing officer bad ka jingpyntreikam ïa ka 80:20 female male ha ka kam Nursing Officer, bad ïa ki experience certificate kaba dei tang na ka bynta ki jaka sumar kiba don 50 jingthiah ba dei ban weng ïa ki Nursing Officer, nangta ka examination centre ba dei ban buh ha Meghalaya bad ym dei sha kiwei pat ki jylla bad ba ïa ki eksam dei ban pynlong lyngba ka offline mode, dei ban bishar biang ïa ka roster register nalor kiwei kiwei pat ki jingdawa.
Na ka liang ka KSU ka la dawa ruh ïa ki bor pynïaid jong ka NEIGRIHMS ban pynlong ïa la ka recruitment examination hadien habud, nangta ka bhah na ka bynta ka kam Group B dei ban pynjlan nalor ka jingdonkam ban wanrah ki jingkylla haba ïadei bad ki recruitment rule nalor kiwei pat ki jingdawa.