Shillong, Jymmang 06: Ka jylla Meghalaya ha ka 7 tarik kan pynlong ïa ka mock drill ban pynkhreh ïa ka jinghiar thma ki liengsuiñ ne ‘Air Raid Precaution’ naduh ka por 4 baje janmiet shaneng.
Ïa kane ka khubor la pyntip da u Senior Staff Officer uba dei ruh u Additional PRO jong ka Directorate of Civil Defence and Home Guards u Bah Paul Shylla bad pynpaw ruh ba ka Air Raid siren yn sa pynsawa ha ka por 6:30 janmiet bad kan don ruh ka “Black-Out” ne jingpynlip bording ba ar minit hadien ba la pynsawa ïa ka siren.
U Bah Shylla u la bthah ïa ki paidbah ba kim dei ban klumar jingmut namar ba ïa kane la leh kum shi bynta jong ka mock drill.
