Dawa ka VPP ïa ka sorkar ban sdang tohkit halor ki jingkynnoh bei tyngka u Myntri ïa ka HNLC

Shillong, Jymmang 06: Ka Voice of the People Party (VPP) ka la pynpaw ïa ka jingsngewkhia kaba jur halor ka jingkynnoh jong ka seng lehnoh ka Hynñiewtrep National Liberation Council (HNLC) ba u Bah Sniawbhalang Dhar, uba dei mynta u Myntri ka sorkar jylla uba khmih ïa ka tnat ki Kam Pynroi Sor hapoh ka sorkar MDA ba u la donkti ban ai jingïarap bad bei pisa sha kane ka seng ha ka por ba u dang long u Myntri ha ka sorkar ba la ïalam da ka sorkar Congress ha ka jylla.
Katkum ka jingkynnoh ba la phah da u General Secretary ka HNLC u Bah Saiñkupar Nongtraw, u la kam ba u Bah Dhar u la nohsynniang pisa sha kane ka seng lehnoh bad mynta pat u la pynjngai ïalade hadien ba u la pynïasoh noh bad ka seng saiñ pyrthei ka National People’s Party (NPP) kaba don ha ka bor synshar bad kum kine ki jingkynnoh ba la pynmih da ka seng lehnoh ym lah satia ban kyntait
Haba shim ba ïa kane ka kam ka long kaba kongsan, na ka liang ka VPP ka dawa ïa ka sorkar jylla ba ka dei ban tohkit mardor bad ban aiti ruh sha ka National Investigating Agency na ka bynta ki kam jong ka jingsngaiñ ka ri.
Halor ki kam jingshngaiñ jong ka ri la dei ban phah hiar shuki ïa une u Myntri napoh ka kynhun Myntri jong ka sorkar jylla. Na ka liang ka VPP ka la pynpaw ruh ka jingsngewkhia haba ïadei bad ka jingshah pynshitom jong ki arngut ki dkhot ka HNLC kiba la shah kem.
Ka VPP ka la ong ruh ba ki bor ba dei peit ki dei ban bat ïa ki aiñ bad ka hok longbriew manbriew bad ïa kane ka jait jingpynshitom dei ban tohkit laitluid bad ki nongshong shnong jong ka Meghalaya ki don hok ban tip ïa ki jingshisha. Na ka liang ka sorkar ruh kam dei ban shu sngap jar jar halor kine ki jingkynnoh kiba long kongsan na ka bynta ka jingshngaiñ jong ki paidbah. “Ngi kyntu ïa u Myntri Rangbah ka jylla ban kren eiei bad ban sdang noh ka jingtohkit kaba mardor haba ïadei bad kane ka kam,” ong ka kyrwoh ba la phah da u Dr. Batskhem Myrboh, nongai ktien ka Voice of the People Party (VPP).