Pynbna ka KHADC ban pyllait noh ïa ka Arrear jong ki nongtrei bad MDC ba shongthait
Ha u Nohprah yn pynlong biang Monolith Festival
Shillong, Naitung 25 : Ka Executive Committee jong ka KHADC hynne ka sngi ka la shim ïa ka rai ban pylliat noh ïa ka arrear jong ki nong-trei ka Council kata kynthup ïa kiba dang trei mynta bad ruh kito kiba la shongthait bad kumjuh ruh ïa kito kiba MDC barim.
Haba kren bad ki lad pathai khubor, u CEM ka Council, Bah Pynïaid Sing Syiem u la ïathuh ba tang na bynta ka arrear mynta u snem ka la kot sha ka 80 lak tyngka, kata kynthup ïa ka arrear jongki MDC barim kiba don phra ngut hadien ba ki la jop ïa ka mukotduma ha High Court.
“Ngi la rai ban pynkhuid lut ïa baroh ki jingsiew kiba dang sah (arrear) na bynta ki nongtrei jong ka Council bad jong ki ophisar kata na bynta kiba dang trei mynta bad kumjuh kito kibala ïoh penshon. Kane kan kynthup ruh ïa ka arrear jong ki 8 ngut ki MDC ba rim kiba la jop ïa ka mukotduma ha High Court ba ka Council ka hap ban siew penshon ïa ki kaba kot 24lak tyngka,” u la ong.
Katkum ka jingïathuh jong u, lada khein kyllum lang baroh, katei ka jingsiew kaba ki hap ban siew ka la kot sha ka 6klur tam bad jan kot sha ka 6.5 klur tyngka.
“Ïa kane ka EC ka la rai mynta ka sngi ba ngin sa pyllait noh shen ïa kane ka arrear kaba tang jong ki nongtrei ka la jan kot sha ka 5klur tyngka,” u la bynrap biang.
Ha kajuh ka por, u CEM u la ïathuh ruh ba ka Council ka la rai ban treilang bad ka sorkar jylla mynta ka kynti na ka bynta ban pynlong biang ïa ka Monolith Festival ha u Nohprah mynta u snem.
“Ngi la rai ban pynlong biang ha u Nohprah mynta u snem hadien ba ngi ïoh ba kiwei ki jylla bad wat na shabar ri India ruh ki kwah ban tip khambha haba ki ïohi ïa ka jingriewspah ka riti dustur jongngi,” u la ong.
U CEM u la ong ruh ba tang ha u pud u sam jong ka Council ki don haduh 54 tylil ki elaka bad na kawei ka elaka sha kawei pat ka ïapher bad kumta katei ka tamasa kan long ka kabu ïa baroh kito kiba kwah ban tip khambha bad kham jylliew ïa ka riti dustur bad ka jinglong tynrai ban wan ha kum kitei ki tamasa tynrai.