Pyllait paidbah u CM ïa ka GREEN Meghalaya + scheme na bynta ka Ri-lum Garo

Tura, Risaw 03 : U Myntri Rangbah ka Jylla Conrad K Sangma, ula pyllait paidbah ïa ka GREEN Meghalaya plus scheme, kaba thmu ban nang pynbun ïa ki jaka khlaw ha Meghalaya bad ban pynneh pynsah ïa ki khlaw jong ka Ri-lum Garo. ïa kane ka skhim la pyllait ha ka jingïalang ba long ha Tura ha ka sngi Balang.
Ka GREEN Meghalaya Plus ka dei shibynta jong ka prokram ka Sorkar kaba la tip kum ka Payment for Eco System Services (PES), ha kaba la ai jingïarap song pisa haduh T.20,000 shi hectare manla u snem sha ki Shnong ki thaw bad ki riew shimet kiba ïada bad pynneh pynsah ïa ki khlaw. Ka Green Meghalaya Plus ka don jinthmu ban kynthup ïa ka jingpynïar ïa ki jaka khlaw sha ka 50,000 hectare ban ai jingïada.
Ha ki snem bala leit noh, palat 3000 ngut ki riew shimet bad ki shnong, kila ïoh jingmyntoi na kane ka skhim bad palat 54,000 hectare ki jaka khlaw la lah ban ai jingïada bad pynneh pynsah.
Haba kren ha ka jingïalang, u Myntri Rangbah ula pynpaw ïa ka jingsngewnguh ïa ki nongïoh bynta na kylleng ka Ri-lum Garo kiba la wan ïashim bynta ha kane ka prokram ban ïada ïa ki khlaw ki btap.
“Ha ki hynniew snem bala leit noh, ka Sorkar ka la buh ïa u mawnongrim bad kala sdang ïa ki prokram ki ban ai jingmyntoi ïa ki briew jong ngi, kaba lam sha ka jingkiew sted bad ka roi ka par jong ka Jylla. Kum ka Sorkar, ngi la pynshlur bad sam ïa ki song pisa bapher bapher na ka Jylla, ka Sorkar Pdeng bad ki Agency na shabar ka Jylla na ka bynta ka jingkiew shaphrang jong ka Jylla” ula ong.
Haba kdew ba ka roi ka par jong ki kam bapher bapher ka long kaba kongsan ka ban nang pyntyllun shakhmat ïa ka jingkiew ka ïoh ka kot, u Conrad ula ong “Ngi hap ban don ïa ka jingkitkhlieh na ka bynta ka mariang bad ban ïatrei ha ka rukom ka ban pynbiang tarajur ïa ka mariang bad ka roi ka par”.
U pyntip ha ki arsnem bala leit noh, ka Sorkar Jylla ka la pynlut ïa palat T.44 klur ban pynneh pynsah bad ïada ïa ki khlaw bad ka la mang ruh sa palat T.200 klur ban pyndonkam ha kine ki snem ban sa wan.
Ula kyntu ïa ki Shnong ki thaw ba kin ïashim bynta shithem da ka jingkitkhlieh ban ïada bad pynneh pynsah ïa ki khlaw.
Ha kane ka prokram, u Myntri Rangbah ula sam ruh ïa ki cheque sha ki nongïoh bynta jong ka CM ELEVATE, FOCUS bad ka Parment for Eco System Services.