Pyllait ka sorkar pdeng 41.25 klur ban siew ïa ka Scholarship ki samla pule, kumba 30,000 ngut kiban ïoh
Sahdien ka jylla ha ka jingdon ki IAS, IPS
Shillong, K’Lyngkot 12 : Ka sorkar pdeng lyngba ka tnad Tribal Affairs ka la dep pyllait haduh 41.25 klur tyngka ha ka sien pyllait pisa kaba ar na ka bynta ka scholarship jong ki samla pule ka jylla (post matric scholarship) kiba dei ki Scheduled Tribae jong ka Meghalaya na ka bynta ka samoi treikam jong u 2023-24.
Haba pynbna ïa kane, u Myntri ka tnad Pule Puthi ka sorkar jylla, u Rakkam A Sangma ha kane ka sngi Thohdieng u la ong, “Ngi la ïoh pdiang mynta ka sngi 41.25 klur tyngka ka pisa ha ka sien pyllait pisa kaba ar na ka bynta ka post matric scholarship sha ki samla pule ka jylla.” Katkum ka jingïathuh jong u, kin don kumba 30,000 ngut ei ei ki samla pule kiban ïoh ïa katei ka scholarship ha kane ka sien pyllait pisa kaba ar na ka sorkar pdeng.
“Ngi dang pynkhreh mynta bad ngin pyrshang ba la kumno kumno ha ka taiew ban wan ngin sa ïoh pyllait noh ïa ka pisa sha ki samla pule,” u la bynrap biang.
La ïathuh ruh ba ha ka sien pyllait pisa kaba nyngkong na ka bynta ka post matric scholarship, ka sorkar ka la dep ban pyllait ïa ka pisa sha ki 37,000 ngut ki samla pule ka jylla bad kiba sah mynta kadei sa tang kitei ki 30,000 ngut kiban sa ïoh shen.
“Nga pynpaw ka jingsngewnguh ïa u Myntri Rangbah bad ïa ka sorkar pdeng bad ïaroh ruh ïa ki samla pule kiba la pynkynmaw man ka por ïa kane ka ishu. Ha kajuh ka por nga kyntu ruh ïa ki samla pule ba kin pyndonkam hok ïa ka scholarship khnang ba kan dei tang na ka bynta ka jingpule jong ki hi,” u la ong.
Halor ka jingkynnoh pyrshah ïa ka sorkar jylla, u Myntri u la ong, “Kumba phi la ïohi ba ïa ka jingpyllait pisa ka Ministry ka la phah 41.25 klur tyngka mynta ka sngi (12tarik Kyllalyngkot), kumta ka jingkynnoh ba ka sorkar jylla ka pynslem kam don nongrim ei ei.”
Na ka liang u Myntri u la pynkynmaw ruh ba ka jylla ka duna bha ha ka jingdon la ki jong ki ophisar IAS bad IPS ha kine ki khyndiat snem. “Kum kine ki khubor ha ka jaka ban pynduh mynsiem ka la dei ban ai mynsiem ïa ki samla ba stad ka jylla ba kin mih shakhmat. Lada ki samla pule na Bihar, Gujarat, Assam bad Arunachal Pradesh ki lah balei na Meghalaya kim lah. Kane ka thong kadei ban rung ha iwei pa iwei i samla pule,” u la bynrap biang.