Shillong Cricket League: Khur jingjop ka Youngstar bad ka SMCA

Shillong, Kyllalyngkot 13: Ki ar kynhun ba kynthup ïa ka Youngstar bad ka SMCA ki la khur jingjop ha ka jingïalehkai kaba la long hynne ka Sngi Saitjaiñ jong ka lympung kriket kaba la tip da ka Shillong Cricket League 3rd division ba la pynïaid da ka Shillong Cricket Association ha ryngkat ka jingïatreilang bad ka Samkhamti ha madan Urkaliar.
La sdang ïa ka jingïakhun ba nyngkong hynne ka sngi dei hapdeng ka Youngstar CC pyrshah ïa ka Matador CC. ïa ka toss la jop da ka Youngstar ha kaba kane ka kynhun ka jied ban bol nyngkong.
Na ka liang jong ka kynhun Matador ka la shah pynhap baroh ki wicket da tang 91 ron na ki 18 over. Ki nongtied kiba la lah ban kamai ron ïa ka kynhun dei tang u Om Chettri u ba la tied 42 ron na ki 43 bol.
Dei ki rangkawangbol ka liang pyrshah kiba la lah ban tyngshaiñ bha, bad kine ki kynthup ïa u Adit Pradhan (4 over: shah tied 21 ron: khur 2 wicket) bad u Nehal Sharma (3 over: shah tied 12 ron: pynhap 2 wicket) kiba la ïoh ban khur mar 2 wicket.
Haba jubab ïa katei ka thong ba la buh, ka kynhun Youngster ka la lah ban pyndep tang hadien 19.1 over ban kynjoh sha ka 94 bad hap 7 wicket.
Na ka liang jong ki rangkawangbol ka Matador ki la trei shitom ban khur jingjop, ha kaba u Jerry u ba la kawang 4 over, shah tied tang 8 ron u la khur haduh 3 wicket, katba u Taikupar Nongkynrih u la kawang 2.1 over, shah tied 10 ron bad khur 1 wicket, hynrei phewse kam shym la biang ïa ka kynhun ban lait na ka namrem.
Napdeng ki nongtied ka kynhun Youngstar kiba la kamai bun ron ki long u Krishiv Choudhary u ba la tied 24 ron na ki 31 bol katba u Adit Pradhan u la kamai 15 ron na ki 13 bol kaba la ïarap ïa ka kynhun ban khur jingjop da 3 wicket. ïa ka nam Player off the match la khur da u Adit Pradhan na ka kynhun Youngstar CC.
Haba phai pat sha ka jingïakhun kaba ar hapdeng ka YALM pyrshah ïa ka SMCA, ka jingïakhun ka la sdang ha kaba YALM ka la jied ban bol nyngkonng hadien ba jop ïa ka toss.
Haba shim ïa ka pali ban tied nyngkong, ka kynhun SMCA ka la buh thong haduh 186 ron hap tang 5 wicket na ki 20 over. U Manirul Islam u la khyrwit 36 ron na ki 20 bol, katba u Rehan kharbuli u la tied 35 ron na ki 32 bol.
Napdeng ki rangkawangbol ka liang pyrshah kiba la lah ban seisoh ki kynthup ïa u Tomu (4 over: shah tied 36 ron: khur 2 wicket) bad u Arun Tamang (4 over: 28 ron: khur 2 wicket).
Haba pyrshang ban beh ïa katei ka thong ba la buh, ka YALM ka la shah pynhap noh da tang 172 ron na ki 19.2 over. Na ka liang jong u Arun Tamang u la tied 55 ron naki 36 bol, katba u Tanveer Sharma u la kamai 36 ron na ki 35 bol, hynrei kam shym la lah ban ïarap ïa ka kynhun ban khur jingjop naba ka la shah rem noh da 14 ron ha ka SMCA.
U Rehan kharbuli u la tyngshaiñ lyngba ki 3.2 over, shah tied tang 27 ron bad pynhap haduh 5 wicket, katba u Rupin das u la kawang 4 over, shah tied 25 ron bad khur 3 wicket. ïa ka nam Player of the match la khur da u Rehan kharbuli u ba la tied 35 ron ryngkat bad 5 wicket kiba u la ïoh pynhap.