Pur sted ka party TMC ha Mawshynrut Constituency baroh kawei: Justin Momin

Riangdo, Nailur, 7: U Justin G. Momin kyrtong ka TMC na Mawshynrut Constituency, u la ong ba ka party ka la sdang ban pyntyllun shait shait ïa la ka kam ban shut pyn nep ïa la ki reng na ka bynta ban ïakhun ïa election ha u snem 2023. Ïa kane u ong ba la leh da ka jingpynpaw jingkyrshan jong ki paidbah na ka Constituency baroh kawei. Namar ki la ngiah ïa ka khet synshar kaba long donbor jong ka party NPP bad u MLA jong ka.
Utei u kyrtong u ban sa ïa aireng lang ha ka madan jied nongmihkhmat ha ka jylla Meghalaya, u dei u ba na ka shnong Nongthawkhong, kawei na ki shnong kaba don ha ki thaiñ Jaïaw bad Mawlai hapoh ka Hima Nongstoiñ, West Khasi Hills District. U dei ruh u ba dang shu mih na ka seng Congress bad ha kajuh ka por uwei na ki snar ba khlaiñ bha ha ka election kaba dang shu dep bad u la long ruh u ba ar ha u snem 2018.
Ha ka jingïakren bad u nongthoh khubor, u la ong “Ha ka jingïaid lynti jong nga bad haba nga la ïakren sani bha ïa u paidbah jong kane ka thaiñ, ki paidbah ki la ong ba kim shym la ïoh ïa ka kaei kaba la ap khmih lynti na u Gigur Myrthong. Ki paidbah ki la kwah eh ïa ka jingkylla bad ka lad ban wanrah ïa ka jingkylla, ka dei tang lyngba ka All India Trinamool Congress”.
U la ong ruh, “Ki paidbah ki la ïohi ïa kane ka sorkar kaba mynta bad ïa ka jinglong jingman jong ki seng bapher bapher kiba la don bynta lang ha kane ka sorkar MDA bad ki la peitngor bha bin pa bin. Don kiba kynnoh ba nga long lok ba jan bad u Gigur Myrthong, hynrei ka jingïadei lok bad ba haïing kam dei ban khleh lang, namar nga don la ka jong ka jingïohi hynrei ka pher na kaei kaba u ïohi”.
“Kane ka seng saiñ pyrthei All India Trinamool Congress hapoh ka jingïalam jong u Dr Mukul Sangma myntri rangbah barim ka jylla Meghalaya, ka la sdang shait shait ïa la ka kam bad ka la long kum u thied snam ha Mawshynrut, ka Constituency kaba phi la tip hi, ba haduh mynta ka dei kawei na ki Constituency kaba dang kham kyndong hapoh ka District jong ka West Khasi Hills, ne wat hapoh ka jylla ruh kaba ngi lah ban ong”.
“Ka jingkhlaiñ ka party te phi la ïohi hi naduh ka jingïalang paidbah kaba la pynlong ha u bnai u ba dang shu dep, ha kaba kane ka party ka la ïoh ban pynshkem syndon ïa ki nongkitkam jong ka ha katei ka thaiñ lyngba u bah James Lyngdoh State Vice President ka Meghalaya Pradesh Trinamol Congress, ryngkat u Dr. Mukul Sangma bad kiwei kiwei. Ka sur kaba mih na ka jingïalang ha katei ka sngi, ka la long kaba shai kdar ba ki paidbah ka Mawshynrut Constituency, ki la ngiah la kdang ïa ka NPP, Bah Gigur Myrthong bad ka khet synshar jong u”, u la ong shuh shuh.
Ha ka jingïadei bad ka seng Congress, Bah Justin u la ong, “Nga ïohi ïa ka jingkyrduh nongïalam ha ka seng Congress, kumta nga la iehnoh ïa ka shadien bad nga pynïasoh noh bad ka TMC, namar ha kane ka seng ngi don ïa u nongïalam u ba tbit. Ban shu rung klumar ha kano kano ka seng khlem ki nongïalam kiba tbit, ngin ym poi shano shano ruh bad nga ïohi ba ki nongïalam jong ka TMC, ki lah ban ïalam ïa ngi sha kata kaba ka dei ïa ngi ba ngin poi. Ki nongkyrshan jong nga kiba na ka seng congress ruh ki kyrshan radbah ïa ka rai jong nga”.
U la ong ruh, “Ka thong kaba nga buh shakhmat ka dei na ka bynta ban ïada ïa ka riti dustur jong ki paidbah na ka jingshah thombor jong ka kiwei pat. Ki paidbah Lyngngam bad ki khasi maram kiba don ha ka Constituency ki kham pher ban ïa kiwei pat ha ka rukom pyrkhat. Namarkata ngi dei ban pynneh pynsah ïa kaei kaba ngi ju leh, kum ka rukom ka dustur kaba ngi ju leh na ka por sha ka por naduh kulong kumah, la ka long ha ka bam ka dih ne ka riam ka phong bad bun bah kiwei pat ki bynta”.