Ailad biang ïa nga ha u 2023, ki jingkyrkhu kin sa tuid ha kane ka distrik: Dy. CM

Mawkyrwat, ‘Nailur 07: U Symbud Myntri Rangbah ka Jylla Meghalaya, bah Prestone Tynsong haba kren ha ka jingïalang jong ka party National People’s Party (NPP) ha Mawkyrwat u la buh ka jingkyrpad ïa ki paidbah jong ka South West Khasi Hills District ba kin long kiba trei shitom da kaba kin ai lad biang ïa u bad ïa u Chief Minister ba mynta ba kin jop biang ha kane ka elekshon 2023 khnang ba ki jingkyrkhu kin sa tuid ha kane ka distrik.
Shuh shuh ha ka jingkren jong u, u la ong ba kum ki nongtrei party ki dei ban trei da ka mynsiem kaba khuid, ka kaba jai jai, kaba tipbriew tipblei bad ym da donkam ban da ïa kynthoh briew ïano ïano ruh hynrei kin ïaid beit ha la ka jong ka nongrim bad da kaba pynkynmaw ba kawei na nongrim jong ka party NPP ka long ba kane ka party ka dei ka National Party ha kaba ka election commission ka la ai bor bad ithuh haduh ha Nongbah Delhi kumba long ka BJP bad ka Congress.
Kaba ar ka nongrim ka long, ban ïaleh katba lah ban ïada ïa ka hok jong ki rit paid kiba don hapoh jong ka North Eastern State baroh kawei. Hynrei ïa ka nongrim jong kiwei pat ki pat ym lah ban tip ïoh ki don ka thong ban shakri tang hapoh South West Khasi Hills District ne wat ban ong ha ka Jylla baroh kawei ki don ka jingartatien, katba ka NPP ïeng skhem da kaba ka kwah ban shakri nyngkong eh ïa ka Jylla la jong, kaba ar ïa ka jylla jong ka North East, bad kaba lai ka long ban ai ka jingshakri na ka bynta ki rit paidbah hapoh ka ri India baroh kawei.
Lyngba ki ar tylli ki kam bah jong ka sorkar MDA lyngba ka NPP ha kaba ka la wanrah ïa ki kam pynroi hapoh jong ka South West Khasi Hills District, kata ïa ka Ranikor Civil Sub Division bad ka jingpynbna Community College ïa ka Sngap Syiem College, Mawkyrwat, u bah Prestone u sngewbha kyrpad ïa ki paidbah ba to kin ïa noh ka kti kamon ka kti kadiang sha kane ka party.
Haba kren halor ka dorkhas ba la ai da u bah H.S. Diengdoh, kaba kdew halor ki jingeh jong ki paidbah jong ka thaiñ Shilliang Um bad ba ki kwah ban wanrah ïa ka Shilliang Um Community & Rural Development Block kaba ha jaka pdeng kan dei ha Mawsaw, ban buh ïa ka Police Outpost ha Umdohlun bad ban kyntiew kyrdan ïa ka Shngimawlein Health Sub Centre sha ka Primary Health Centre (PHC), na ka liang jong u bah Prestone u la kren da kaba shai ba ïa kane ka bynta un dang hap ban peit bniah bad egsamin shwa namar mynta um pat nud ban ai rai ei ei ruh em.
Ha kane ka sngi la ïoh ruh ka jingkren na u kyrtong jong ka party National People’s Party (NPP) jong ka Mawkyrwat Constituency, bah H.S. Diengdoh, ka jingkren na u bah Kitborlang Nongrem, President ka National People’s Youth Front (NPYF), na u Bajop Pyngrope, Spoke Person ka National People’s Youth Front (NPYF) bad kum u MDC jong ka Rymbrai Jyrngam lem bad kiwei de ki nongkyrshan jong ka party.