Nongstoiñ, Lber 19: Ha ka jingjia kaba sngewsih ïa ki khynnah napoh ka jylla kiba leit ban pule ha kawei ka skul kaba don ha ka jylla Karnataka, ha ka district Gokul Educational Institution kaba don ha ka district Gokaipura, kiba la kem pang kynsan na kaba bam ïa ka jingbam ba la ai da ki nongpynïaid jong ka hostel ha ka 17 tarik mynta u bnai, ha kaba uwei u khynnah u ba la tip kyrteng kum u Namebantei Marweiñ, u khun jong ka kong Shimtisful Marweiñ bad u bah Tobarlin Nongsiej, na ka shnong Sohparu West Khasi Hills, u dei uwei uba la ngat ha katei ka apot .Kumta hadien ba ki khynnah ki la kem pang ki nongpynïaid jong ka skul ki la kit noh wut sha Apollo Hospital bad ki la pyntip sha kiba ha ïing halor katei ka jingjia.
U bah Golonsar Marweiñ u Kñi trai jong utei u khynnah haba ïakren bad ki nongthoh khubor mynta ka janmiet, hadien ba ka met jong utei u khynnah ka la wan poi, u la ong ba ki doctor jong ka Apollo Hospital ki la pyrshang kat ba don ki buit ki lad ban sumar ïa kitei ki khynnah ba shitom ha kaba don napdeng jong ki kiba la sdang ïoh bor hynrei utei u khun pyrsa jong u pat u la khlad noh.
Kumta hadien ba la ïoh jingtip ba u la khlad noh na kane ka pyrthei, kawei ka kynhun trei mon sngewbha na ka jylla, kaba la tip kum ka Leisynshar Cultural Society ka la shimkhia bad ka la pynbiang ïa ki jingdon kam baroh bad pynkit ïa ka met jong utei u khynnah da ka Flight Ambulance naduh Appolo Hospital ha duh Guwahati air port.
Utei u kñi u la ong ruh ba ma u ryngkat kiba ha ïing ha sem ki la leit shaw naduh Guwahati bad mynta ka janmiet, ka met jong utei u khynnah ka la wan poi ha ïing ha kaba u lyoh ba dum u la kah ïa kiba ha ïing ha sem.
Utei u Kñi u la ong ruh ïa ka jingleh niam ba khatduh yn pyndep lashai ka sngi bad yn tep don burom ha ka por shi baje noh phai sngi ha u lum jingtep jong ka balang Seventh Day Adventist Sohparu.
