Shillong, Lber 05: U Myntri Rangbah ka Jylla u Conrad K Sangma mynta ka sngi Ba-ar, u la plie paidbah ïa ka jaka thung bad hikai ban thung ruh ia u tit Shiitake ne ka Shiitake Mushroom and Training Centre kaba la bei tyngka da ka tnat Ministry of Tribal Affairs, ka tnat Ministry of DoNER bad ka Sorkar Jylla ha Upper Shillong, haka jingdon lang ka Myntri ka tnat ka rep ka riang ka Dr Ampareen Lyngdoh.
Haba kren ha kane ka sngi, u Conrad u la ong ba ka sienjam ba la shim da ka Sorkar Jylla ka long ban kynthup lang ïa baroh ha ka imlang sahlang katba ka Jylla ka dang jam shakhmat.
“Ka jingkynshew ba ngi la leh bad ka roi ka par ba ngi wanrah kan long lehnoh ei lut lada ka imlang salang baroh kam lah ban kiew lang kumjuh bad long shibynta na ka jingkiew irat jong ka Jylla” ong u Conrad.
U Conrad u la pyntip ba ka Sorkar Jylla ha ki lai snem ka la kynshew pisa palat T.700 klur na ka bynta ban tei ïa ki jingtei ba donkam bad ban pynmih mar na ki marrep na ka bynta ki nongrep khnang ba ka kam rep bad ki mar ba ki pynmih kin ai kamai pynïohnong bha.
“Nga don beit ïa ka jingngeit ba ngim donkam ban leh ïa kiei kiei kiba thymmai hynrei ngi donkam ban ïarap ïa ki nongrep ba kin nang pynjanai ïa ka rukom rep”.
U Conrad u la pyntip ba ka jingthaw ïa ka Shiitake Mushroom Production bad Training Centre, ka dei ka thong ban ïarap ïa ki 1000 ngut ki nongrep bad u la ong ba kane ka shlem ai jinghikai kan lah ban kyntiew ïa ka ioh ka kot ki nongrep kumba T.1 lak man ka por thung haba bynrap “Da kaba shu kheiñ kyllum ngi lah ban ïoh jingkheiñ ba tang ha ki lai snem haduh T. 117 klur ki nongrep kin ïoh kamai pisa”.
U la ai mynsiem ïa ki nongrep ba kin shim bynta ha ka jingrep tit Shiitake namar kane ka kam kan dei ka kam bynrap namar ka donkam duna eh ka jaka ban tep bad ba shimpor tang 15 sngi ka jingtrei man ka por thung.
Nalor kane u la ong baka ïew die tit Shiitake ka la don lypa hapoh ka Jylla bad ka don ruh ka thong ban khaïi shabar ka Jylla lada ka jingpynmih ka kham bun bad u la kular ïa ki nongrep ba ka Sorkar ka kloi ban kyrshan ïa ki nonggrep.
Ia kane ka Projek la tei ha ka jinglut kaba T. 15.15 klur bad kane ka Unit ka don hapoh ka Mushroom Development Centre Upper Shillong ïa kaba la pyntrei da ka jingïatreilang bad ka YATS Corporation Tokyo kaba dei ruh ka Company ba heh tam ban pynmih tit Shiitake.
Lah ban kdew ba T.62.37 klur la mang naka bynta ka Mushroom Mission naka bynta san snem bad haduh mynta palat 5000 ngut ki nongrep kila ïoh jingmyntoi na kane ka Prokram.
Ka jingpynshlur ban rep ïa u tit Shiitake ka dei ka thong jong ka tnat ka rep ka riang hapoh ka Mushroom Mission lyngba lai tylli ki mat kata ban wanrah ki bor Technology, ban kyntiew ïaka ïew bad ban ïatreilang bad ki paidbah.
