Pyni bor ki kynhun shitniam ha Assam rai ujor sha ïing Bishar ïa ki Nongïalam Niam Khristan

Guwahati, Lber 05 : Hadien 15 sngi ba kut ka jingaipor ïa ki skul Missionary Khristan ba kin weng ïa ki motdur u Jisu, ka Mary bad u Diengphna, katto katne ki kynhun shit niam Hindu ki la byrngem ban leit mudui da ka mukotduma ha ïing bishar High Court Guwahati pyrshah ïa kine ki Missionary namar ka jingleh ïa ki kam ba pyrshah ïa ka Ri India bad jingleh niam khristan ha ki skul Mission hapoh ka Jylla Assam.
Kane ka kynhun ki Hindu ka dei kaba la ïalam khmat da ka Kutumba Surakshy Parishad. “Ka kynhun jong ki Seng Sanatan Hindu ki la rai ban leit mudui sha Guwahati High Court bad ban mudui ïa ka PIL halor ka kam ban weng ïa ki jingleh niam bad jingpynïeng mot niam na ki phyllaw ïingskul” ong u President ka Kutumba Surakshya Parishad u Satya Ranjan Borah haba ïakren bad ki lad pathai khubor ha Guwahati Press Club mynta ka sngi Ba-ar.
Kine ki seng Hindu ki la dawa ban weng ïa baroh ki mot jong u Jisu Khrist bad ka Mary nalor ki diengphna na ki skul Mission.
Kane ka jingdawa ka la mih hadien ka jingjia hapoh ka skul Mission-Calvary English School kaba don ha Balipara, Sonitpur District ha kaba uwei u khynnah 10 snem ula shah shoh bad shah pynshitom tang namar ka jingpynmih ïa ka ktien “Jai Sri Ram” haba plie ïa ka kot hapoh kamra shong klas. Kane ka jingjia kala jia ha ka 5 tarik u Rymphang.
“Kane ka jingjia kala pynkheiñ ïa ka Juvenile Justice Act, Article 14,15 jong ka Riti Synshar ka Ri, ka New Education Policy ha ryngkat ka Article 51 (A) jong ka Riti Synshar ka Ri India” ong u Borah.
Ula ong ba hadien kane ka jingjia, ngi la pynpaw ïa ka jingbym sngewtynnad bad ngi la thoh ruh ïa bun ki shithi sha u Lat ka Jylla Assam, Myntri Rangbah, Chief Secretary bad u Archbishop ka Guwahati nalor u District Commissioner ka Sonitpur District. Hynrei u ong, ka long kaba sngewsih ïa ka jingbym don jingkitkhlieh bad jingleh bym suidñiew jong ka Sorkar Assam halor kane ka jingjia.
Kane ka kam ka dei kaba la ïakren ruh ha ka ïingdorbar Thaw Aiñ jong ka Meghalaya ha ka 27 tarik Rymphang ha kaba u Myntri Rangbah ka Jylla Conrad K Sangma ula ong ba ka Sorkar Jylla kan pynshisha shuwa ïa ka khubor halor ka jingthombor ïa ki skul Mission ha Assam shuwa ba un ïakren bad ki bor Sorkar ha Dispur bad ha kajuh ka por ula kular ban ai ïa ka jingïada bad jingshngaiñ ïa ki paidbah kiba sah ha khappud ki ar Jylla.
“Ngi la jubab da ka emai ba kwah ban ïakren bad u Myntri Rangbah ka Meghalaya ruh halor kane ka jingsngewkhia jong ngi. Hynrei ym don mano mano ruh ba kwah ban pynbeit ïa kane ka kam haduh mynta” ong u Borah.
“Kumta ngi la rai ban leit mudui sha Gauhati High Court bad ban mudui da ka PIL ban weng noh ïa ki jinglehniam bad ka jing buh mot niam ha ki phyllaw ïingskul” ula ong.