Nongpoh, Ïaiong 30: Kum shi bynta ban kyntiew bad kyrshan ïa ki nongri khñiang bad ki nongthaiñ jaiñ Ryndia ha Raid Nongtluh, u MLA ka Nongpoh, Bah Mayral Born Syiem, mynta ka sngi u la plie paidbah ïa ka Yarn Bank ne ka jaka pynlang bad kynshew ïa u ksai Ryndia jong ka Umkon IVCS ha shnong Umkon, Ri-Bhoi District.
Ha ka jingïalang plie paidbah, la sakhi lang da u Bah A. Suting, Deputy Project Director ka MBMA, Bah Nicholas Syngkli, Chairman ka Umkon IVCS, Bah Teibun Rynshon, Manager ka Umkon IVCS, ryngkat bad ki nongïalam shnong, ki nongthaiñ jaiñ bad ki paidbah nongshong shnong.
Ïa ka building jong katei ka Yarn Bank la tei lyngba ka skhim MegLAMP jong ka MBMA ha ka jinglut kaba kumba T.7 lak. Shuh shuh, la ïoh jingïarap pisa kumba T.42 lak lyngba ka skhim FOCUS ban kyrshan ïa ka jingtreikam jong katei ka Yarn Bank bad ban ai jingïarap ïa ki nongri khñiang bad ki nongthaiñ jaiñ ba kin lah ban pynlang, pynneh bad die ïa u ksai Ryndia, khamtam ban kyntiew ïa ka ioh ka kot jong ki.
Haba kren ha kane ka sngi kum u kongsan, u Bah Mayral Born Syiem u la ong ba u ksai Ryndia u don ha syndah ka dohnud jong u. U la pynpaw ruh ka jingsngewkmen ban iohi ba ki jaiñ Ryndia ka la nang kiew shaphrang bad la sdang ban paw ym tang hapoh ka jylla hynrei wat shabar ruh, hadien ba la ïoh jingithuh na ka sorkar.
U la ong ruh ba ka long ka jingsarong kaba khraw ba ka thaiñ Umden-Diwon ha Raid Nongtluh ka la ïoh jingithuh kum ka Eri Silk Village, bad la ïoh ruh ïa ka GI Tag kaba pynshisha ïa ka jinglong trai jong ki jaiñ Ryndia na katei ka thaiñ. Shuh shuh, la pyntip ba ka sorkar kan sa wanrah ruh ïa ka project thymmai ban tei ïa ka Craft Village, kaba lah ban long ka jingmyntoi kaba khraw ïa ki nongri khñiang bad ki nongthaiñ jaiñ ha katei ka thaiñ.
