Plie u Ma Ngaitlang Dhar ïaka ‘Ultrasonography Clinic’ ba nyngkong ha thaiñ Amlarem

Jowai, Risaw 27: U MLA barim ka Umroi, u ma Ngaitlang Dhar mynta ka sngi ula plie paidbah ïa ka ‘Ultrasonography Clinic’ kaba nyngkong ha Rasongsli Nursing Home, Amshipai, Amlarem West Jaiñtia Hills District.
Ha kane ka sngi ïa ka jingïalang la pynïaid da u Dr. A. Khonglah uba dei ruh u Medical Officer ka Padu State Dispensary bad uba la pynsngew halor ka jingïaid lynti kaba la shim por kumba shisnem ban wanrah ïa katei ka Ultrasound Clinic.
La ïoh ruh ki kyntien pdiang naka Kyntiewbor Pohshna ka khun jong u ma Rom Dhar u trai jong kane ka jaka sumar kaba la plie naduh ka 9 tarik Jymmang, 2017. Kiwei de kiba ai jingkren ki long u Dr. Faruque Akhtar (Sonologist), u G.L.C Mylliem BDO ka Amlarem C&RD Block, Dr. M. Talang uba juh long Joint Director, u Waheh Chnong War Jaiñtia u K. Pohlong nalor kiwei de.
Katba na ka liang u kongsan ma Ngaitlang Dhar haba kren ula pynpaw ka jingsngewkmen ban ïadon bynta lang ha kane ka sngi, kaba dei ruh ka sngi sah jingkynmaw ïa ka thaiñ War Jaiñtia hi baroh kawei.
Ha ka juh ka por ula ai ka jingïaroh ïa u ma Rom Dhar uba la seng ïa kane ka jaka sumar na ka bynta ki paidbah kiba donkam jingïarap, u kyrmen skhem ba kane ka jaka sumar kan dang ïar shuh shuh ha ka jingai jingshakri ïa ki paidbah ha kine ki sngi ban wan.
Ïa ki kyntein ai khublei ha kane ka sngi la ïoh na ka Rijoice Lamat ka Staff Nurse jong katei ka jaka sumar.