Jowai. Risaw 27: U Deputy Commissioner jong ka West Jaiñtia Hills District u bah B.S. Sohliya, IAS mynta ka sngi ula sam ïa ka Draft Electoral Rolls jong ka Special Summary Revision jong ki 4 tylli ki Constituency kiba kynthup ïa ka 1- Nartiang, 2- Jowai, 3- Raliang and 4- Mowkaiaw sha ki nongmihkhmat jong ki kynhun Seng saiñhima ha Conference Hall, DC office Jowai.
Ha kane ka prokram ba lyngkot la ïadonlang i Additional Deputy Commissioner (Election) kong B. Blah, u ADC bah F.B. Basan bad i ADC kong DV Lyngdoh.
U bah Sohliya ula ong ba ïa kane ka Draft Electoral Roll jong ka Special Summary Revision na ka bynta kine ki saw Consituency la dep ban pynmih bad la buh por naduh ka 27 tarik u Risaw haduh ka 9 tarik u Nohprah 2023 ban leh ïa kino kino ki jingpynbeit ne ki jingthep kyrteng ïa kiba la dei hok. Ula kyntu ruh ïa ki samla kiba la kot ïa ka rta ba 18 snem shwa ne ha ka 01.01.2024 ba kin pynrung kyrteng noh ha ka Electoral Roll khnang ba kin ïoh bynta ban ïashim bynta ha kino kino ki jingjied ïa ki nongmihkhmat paidbah.
Na ka liang i kong Blah ba dei ïa ka tnad Election ha West Jaiñtia ruh ila ai ka jingpynshai ba lada don kino kino kiba ujor ne pynbeit ïa ki jingbakla kin leh ïa kane hapoh ka por bala ai naduh mynta ka sngi haduh ka 6 tarik u Nohprah 2023, kumjuh ban pyndonkam da ki form 6, 6A, 7 bad 8 katkum ka jingdawa jong ki. Kala ong ba ka ophis District Election kan sa pynlong ïa ka prokram SVEEP hapoh kine ki por.
Kala ïathuh ruh ba kan sa don ka special campaign ka ban sa pynlong ïa ka jingpynrung kyrteng ha ki Polling Station bapher bapher ha kaba ki BLO kin hap ban don kata ha ka 11 bad 18 tarik u Naiwieng 2023.
