Plie u Lamphang Ïing Dorbar Thaw Aiñ ïa ka GMWSS ba shong dor 118 klur tyngka

Mairang, K’lyngkot, 5: U Lamphang ka Ïing Dorbar Thaw Aiñ ka jylla Meghalaya u Bah Metbah Lyngdoh, hynne ka sngi u la ïoh ban buh ïa u mawnongrim na ka bynta ka Greater Mairang Water Supply Scheme (GMWSS), kaba long ka skhim sam um sha ki 10 tylli ki shnong ka thaiñ Mairang kaba hap hapoh ka Jal Jeevan Mission (JJM). Kane ka prokram la pynlong da ka tnat PHE jong ka sorkar jylla ha Tirot Sing Memorial Hall Pyndengumiong, Mairang.
Ha kane ka prokram la wan ban ïashimbynta ruh da u myntri ka tnat PHE ka jylla, u Bah Renikton L. Tongkhar, u Commissioner & Secretary ka tnat PHE, u S.M.A Razi, u Syiem ka Hima Nongkhlaw, u Pa’iem P.M Syiemlieh, u Deputy Commissioner ka Eastern West Khasi Hills District, u Bah W.Nongsiej, u Superintendent of Police ka district, u Bah M. B Syiem, I Chief Engineer ka tnat PHE, I Kong Badarisha M.Lyndem, kiwei kiwei pat ki heh sorkar jong ka District, ki nongïalam shnong bad ki paidbah ka thaiñ.
Ha ka jingkren kum u kongsan, u Lamphang ka Ïing Dorbar Thaw Aiñ ka jylla, u Bah Metbah Lyngdoh, u la ai khublei ïa u myntri ba dei peit ïa ka tnat PHE Bah Renikton L.Tongkhar bad kumjuh ïa baroh ki ophisar bad nongtrei ka tnat PHE, na ka bynta kane ka skhim ïa kaba la ïoh ban buh mawnongrim ha kane ka sngi. U la kyntu ruh ïa ki paidbah kynthup ïa ki nongïalam shnong bad ki paidbah nongshong shnong, ba kin ïatreilang ryngkat ryngkat bad ka tnat PHE jong ka sorkar ha ka por jong ka jingpyntrei ïa kane ka skhim ïa kaba yn sa sdang noh shen.
Haba kren halor ka jingkordor jong ka um ha ka jingim ba man ka sngi, u Bah Metbah u la kyntu ïa ki paidbah nongshong shnong kiba la wan sakhi ïa kane ka prokram, ba kin tyngkai bad pyndonkam adkar ïa ka um bad ki tyllong um, kaba long kawei na ki rukom ban sumar bad tyngkai ïa ka.
U la ong ruh ba ïa ka Jal Jeevan Mission (JJM) la buh dak da ka sorkar kmie ban pynkut ha u snem 2024. Kumta u la buh jingkyrpad ïa baroh kiba ïadonbynta na ka liang jong ka sorkar, na ka liang ki nongïalam shnong bad ki paidbah nongshong shnong ba kin ïatreilang shitrhem, khnang ba yn ïoh ban pyndep ïa kane ka skhim sam um katkum ka por ba la buh.
Lah ban kdew hangne ba lyngba ka skhim sam um, Greater Mairang Water Supply Scheme, ïa kaba la mang pisa kumba 118 klur, yn pynpoi um sha ki 4611 tylli ki longïing jong ki 10 tylli ki shnong ka thaiñ Mairang kiba kynthup ïa ka shnong Pyndengumiong A, Pyndengumiong B, Mairang Mission, Mairangbah, Lumsohkhlur, Mawlong, Sangshong, Madan Bynther, Umthied Bynther bad Nongbah Bynther. Lyngba kane ka skhim yn pynpoi um ruh sha ki jaka pule, ki jaka sumar nongpang, ki ïing anganwadi bad ki ïing dorbar jong ki shnong kumjuh.