Angnud ki paidbah Mawsiangbah ban pynpoi surok haduh kshaid Thupthup

0

Nongstoiñ, K’lyngkot 5: Ka kshaid Thupthup kaba don ha ka wah Rwiang ka hap hapoh u pud u sam jong ka shnong Mawsiangbah kaba jngai kumba san kilomitar na ka surok bah National Highway 44 (E) Shillong Tura ka dei ruh ka kshaid kaba itynnad haduh katta katta.
Kham shaneng ïa katei ka kshaid ki don ar tylli ki thwei hynrei kaba kham itynnad ka dei ka thwei Koh Langheit, namar baroh sawdong ka dap da u shyiap bad na kjat jong katei ka thwei koh Langheit ka wah ka pait ar bynta bad ha pdeng don u lum uba long kum u dewlynnong.
U bah P.Nongsiej uwei na ki riew rangbah ka shnong Mawsiangbah haba ïakren bad u nongthoh khubor, u la ong ba na ka liang ki paitbah nongshong shnong ki kwah bad angnud haduh katta katta, ba ka sorkar kan pynpoi surok sha katei ka kshaid bad lada shna surok shaduh katei ka jaka ka jingjngai ka long tang kumba ar kilomitar ne tam. U la ong ba lada shna surok na jan jingkieng Rwiang pat ka jingjngai ka la jan poi sha ka san kilomitar.
U bah Nongsiej u la ong ruh ba lada ka sorkar kan pynbha ïa ka surok kaba khlad na ka National Highway haduh ka shnong Mawsiangbah bad pynpoi haduh katei ka kshaid, kan long ka jingkyrkhu kaba khraw ïa ki nonghong shnong kum ka Nong-khñiang, Maw-langniang bad kiwei kiwei ki shnong kiba don ha katei ka thaiñ.
U la ong ruh ba watla ym pat don surok ruh ki don shibun ki briew na kylleng ki jaka kiba ju wan peit kai sha katei ka kshaid man ka por. Lada la don ka surok kaba biang lei lei ki nongwan jngohkai na kylleng ki jaka kin wan poi man ka sngi bad kan long ka jingmyntoi kaba khraw ïa ki nongshong shnong kiba shong die jingdie ha ki dukan shnong.

Leave A Reply

Your email address will not be published.